ప్రియాంక రెడ్డి హత్య కేసులో పోలీసులు అచ్చం సినిమాల్లో వ్యవహరించినట్లే వ్యవహరించారు. అయితే.. హీరోయిక్ మూవ్ కాదు.. అచ్చంగా…అది బ్యాడ్ పోలీస్ రియాక్షనే. రాత్రి పన్నెండు గంటలకు ప్రియాంక రెడ్డి తల్లిదండ్రులు పోలీసులను ఆశ్రయిస్తే.. వారి స్పందన అత్యంత ఘోరంగా ఉంది. పోలీసులు తమతో అమర్యాదగా ప్రవర్తించారని అమ్మాయి మిస్సైందని ఫిర్యాదు ఇవ్వడానికి వెళ్తే.. ఎవరితో లేచిపోయిందో అని మాట్లాడారని ప్రియాంక తండ్రి కన్నీరుమున్నీరవుతున్నారు. మా పరిధిలోకి రాదని శంషాబాద్ పోలీసులు చెప్పారని రూరల్ పీఎస్‌లో ఫిర్యాదు చేయమన్నారన్నారు. అక్కడికి వెళ్తే ప్రియాంక అదృశ్యమైన ప్రాంతం శంషాబాద్‌కే వస్తుందన్నారని.. ఫిర్యాదు తీసుకోవడానికే రెండు, మూడు గంటలు తిప్పించారని ప్రియాంక తండ్రి ఆవేదన వ్యక్తం చేశారు.

పోలీసుల నుంచే తీవ్ర జాప్యం జరిగిందని .. ముందే పోలీసులు స్పందిస్తే మా అమ్మాయి బతికుండేదేమోనని కన్నీరు పెట్టుకుంటున్నారు. వంతెన కింద శవం కాలుతుందన్న సమాచారం వచ్చిన తర్వాతే పోలీసులు కేసు నమోదు చేశారు. వారు కదిలే సరికే ఘోరం జరిగిపోయింది. ప్రియాంక రెడ్డి హత్య కేసులో నలుగురు నిందితులను అదుపులోకి తీసుకున్నారు. పాషా అనే లారీ డ్రైవర్ తో పాటు క్లీనర్లు నలుగురు కలిసి ప్రియాంక రెడ్డిపై అత్యాచారం హత్య చేసినట్లుగా గుర్తింంచారు.

నిందితులు మహబూబ్ నగర్, రంగారెడ్డి జిల్లాలకు చెందిన వారిగా గుర్తించారు. టోల్ ప్లాజా వెనకాల ఉన్న ఖాళీ ప్రదేశంలో ప్రియాంకరెడ్డిని రేప్ చేసి హత్య చేసినట్లు పోలీసులు గుర్తించారు.

ప్రియాంక రెడ్డిని కిరోసిన్ తో కాల్చి చంపినట్లు పోస్టుమార్టం రిపోర్ట్‌లో గుర్తించారు. కిరోసిన్ అని తేలడంతో లారీ డ్రైవర్లే చంపినట్టు నిర్ధారణకు వచ్చారు పోలీసులు. ప్రియాంకరెడ్డి హత్య ఘటన… దేశవ్యాప్తంగా సంచలనం సృష్టించింది. అత్యంత దారుణంగా.. ఒంటరిగా అమ్మాయి కనబడితే.. తోడేళ్ల మాదిరిగా.. అత్యాచారం చేసి చంపిన ఘటన..సభ్యసమాజంలో భయాందోళనలు నింపుతోంది. సోషల్ మీడియాలోనూ ఇదే టాపిక్ ట్రెండింగ్ అవుతోంది.