ఈమ‌ధ్య ఇంటెన్సిటీ ఉన్న పాత్ర‌లెవ‌రు చేసినా, అర్జున్ రెడ్డితో పోలిక‌లు వెదికేస్తున్నారు. హీరోలు గ‌డ్డం పెంచినా – అర్జున్ రెడ్డి ఎఫెక్ట్ అనుకోవాల్సివ‌స్తోంది. ఆ సినిమా చూపించిన ప్ర‌భావం అలాంటిది. తాజాగా ఆది సాయికుమార్ ఓ సినిమా చేస్తున్నాడు. సినిమాకి శ‌శి అనే పేరు పెట్టారు. ఈరోజు ఫ‌స్ట్ లుక్ కూడా వ‌చ్చేసింది. ఎప్పుడూ లేనిది ఆది గెడ్డం పెంచుకుని క‌నిపిస్తున్నాడు. పోస్ట‌రు లో త‌న యాంగ‌ర్‌ని కూడా చూపించే ప్ర‌య‌త్నం చేశారు. అన్నిటికంటే మ‌రీ ముఖ్యంగా గ‌మ‌నించాల్సిన విష‌యం.. ఈ సినిమాలో ఆది మెడికోగా న‌టించ‌డం. ఈ క‌థ‌లో ల‌వ్ ఫెయిల్యూర్ అనే టాపిక్ కూడా ఉంద‌ట‌. ఎన్ని ర‌కాలుగా చూసినా.. అర్జున్ రెడ్డి ని చూసి, బాగా స్ఫూర్తి పొంది ఈ క‌థ‌ని రెడీ చేసుకున్నార‌నిపిస్తోంది. శ్రీ‌నివాస్ నాయుడు ద‌ర్శ‌కుడిగా ప‌రిచ‌యం అవుతున్న ఈ చిత్రం దాదాపు షూటింగ్ కూడా పూర్తి చేసుకుంది. 2020లో వేస‌విలో విడుద‌ల చేస్తార్ట‌. పోస్ట‌రు, పాత్ర‌లోనే అర్జున్ రెడ్డి పోలిక‌లున్నాయా, లేదంటే క‌థ కూడా ఆ టైపేనా అనేది తెలియాలంటే అప్ప‌టి వ‌ర‌కూ ఆగాల్సిందే.