గ‌త ఎన్నిక‌ల ముందు బండ్ల గ‌ణేష్ బోలెడంత ఎంట‌ర్‌టైన్‌మెంట్ పంచాడు. టీఆర్ఎస్‌ని ఓడించి కాంగ్రెస్ పార్టీ గెల‌వ‌క‌పోతే 7 ఓ క్లాక్ బ్లేడుతో గొంతు కోసుకుంటా – అంటూ భీక‌ర‌మైన ప్ర‌తిజ్ఞ‌లు చేశాడు. అయితే ఆ ప్ర‌తిజ్హ‌లేం నెర‌వేలేదు. కానీ.. 7 ఓ క్లాక్ బ్లేడు మేట‌రైతే సోష‌ల్ మీడియాలో తెగ వైర‌ల్ అయ్యింది. చాలా కాలం త‌ర‌వాత బండ్ల గ‌ణేష్ మ‌ళ్లీ క‌నిపించాడు. `స‌రిలేరు నీకెవ్వ‌రు` ప్రీ రిలీజ్ ఈవెంట్‌లో. ఈ సినిమాలో బండ్ల‌గ‌ణేష్ ఓ పాత్ర పోషించాడు. షాద్ న‌గ‌ర్‌లోని కోళ్ల ఫార‌మ్‌లో గుడ్లు ఏరుకుంటుంటే.. త‌న‌కు పిలిచి మ‌రీ ఈ అవ‌కాశం ఇచ్చార‌ని, అప్ప‌ట్లో రాజ‌కీయాలూ – సెవ‌న్ ఓ క్లాక్ బ్లేడూ అంటూ రూటు మార్చాన‌ని, తానో `ఎర్రి డాష్‌` అనిపించుకున్నాన‌ని, అయితే ఇప్పుడు బుద్ధిగా సినిమాలు చేసుకుంటాన‌ని, సినిమాల్లోనే ఉంటాన‌ని ప్ర‌తిజ్ఞ చేశాడు. బండ్ల‌గ‌ణేష్ స్టేజీమీద ఉన్న ఆ కాసేపూ…. ఆడియ‌న్స్ నుంచి మంచి స్పంద‌న వ‌చ్చింది. గ‌ణేష్ మాట‌ల‌కు అంతా `ఊ` కొట్టారు కూడా. సో… గ‌ణేష్ దృష్టంతా ఇప్పుడు సినిమాల‌పైనే అన్న‌మాట‌. మ‌రి ప‌నిలో ప‌నిగా ప్రొడ‌క్ష‌న్ కూడా చేసేస్తాడేమో చూడాలి.