మ‌ల్టీస్టార‌ర్ ప‌రంప‌ర‌లో సీనియ‌ర్ హీరోలు భాగం పంచుకుంటున్నారు. క‌థ న‌చ్చితే మ‌రో హీరోతో క‌లిసి న‌టించ‌డానికి, స్క్రీన్ షేర్ చేసుకోవ‌డానికి వెనుకాడ‌డం లేదు. తాజాగా రాజ‌శేఖ‌ర్ కూడా ఓ మ‌ల్టీస్టార‌ర్‌లో భాగం పంచుకోబోతున్నార‌ని స‌మాచారం. రాజ‌శేఖ‌ర్ క‌థానాయ‌కుడిగా వీర‌భ‌ద్ర‌మ్ చౌద‌రి ద‌ర్శ‌క‌త్వంలో ఓ సినిమా రూపుదిద్దుకుంటోంది. ఇది సోలో హీరో సినిమా అనుకున్నారంతా. కానీ.. రాజ‌శేఖ‌ర్ తో పాటు మ‌రో యువ హీరో కూడా ఇందులో న‌టించ‌బోతున్నార‌ని తెలుస్తోంది. శ్రీ‌విష్ఱు, కార్తికేయ‌లాంటి పేర్లు ప‌రిశీల‌న‌లో ఉన్నాయి. ఇద్ద‌రిలో ఎవ‌రు కుదిరినా, ఈ కాంబినేష‌న్‌కి ఓ క్రేజ్ వ‌చ్చిన‌ట్టే. ‘అహ‌నా పెళ్లంట‌’ సినిమాతో ద‌ర్శ‌కుడిగా నిరూపించుకున్నాడు వీర‌భ‌ద్ర‌మ్‌. ఆదితో తీసిన ‘చుట్టాల‌బ్బాయ్‌’ కూడా ఓకే అనిపించుకుంది. ఆ సినిమా త‌ర‌వాత వీర‌భ‌ద్ర‌మ్‌కి చాలా గ్యాప్ వ‌చ్చేసింది. అయితే ఇప్పుడు వ‌రుస‌గా రెండు సినిమాల్ని ప‌ట్టాలెక్కించ‌డానికి ఆయ‌న రెడీ అయ్యారు. అందులో రాజ‌శేఖ‌ర్ సినిమా ఒక‌టి. త్వ‌ర‌లోనే ఈ సినిమాకి సంబంధించిన పూర్తి వివ‌రాలు బ‌య‌ట‌కు వ‌స్తాయి.