విజ‌య్ దేవ‌ర‌కొండ కొత్త సినిమా ‘వ‌ర‌ల్డ్ ఫేమ‌స్ ల‌వ‌ర్‌’ ఈ శుక్ర‌వారం విడుద‌ల అవుతోంది. క్రాంతి మాధ‌వ్ ద‌ర్శ‌కుడు. అయితే ఈ సినిమా టైటిల్ విన‌గానే… విజ‌య్ అభిమానుల‌కు పెద్ద‌గా న‌చ్చ‌లేదు. సినీ జ‌నాల‌దీ అదే మాట‌. అయితే మెల్ల‌మెల్ల‌గా టైటిల్ రిజిస్ట‌ర్ అయ్యింది. అయితే ఈ టైటిల్ విజ‌య్‌కీ న‌చ్చ‌లేద‌ని తెలుస్తోంది. ఈ టైటిల్ గురించి విజ‌య్ ప్ర‌స్తావిస్తూ.. ”ఇది వ‌ర‌కు ప్రియం.. అనే టైటిల్ అనుకున్నాం. చివ‌రికి వర‌ల్డ్ ఫేమ‌స్ ల‌వ‌ర్ ఫిక్స‌య్యింది. ఈ టైటిల్ క‌థ‌లోంచి పుట్టిందే” అన్నాడు.అయితే ఈ టైటిల్ మీకు న‌చ్చిందా? అని అడిగితే నేరుగా స‌మాధానం చెప్ప‌లేదు. ”నచ్చినా, న‌చ్చ‌క‌పోయినా ఏముంది.? అడ్వాన్స్ బుకింగ్స్ బాగా అవుతున్నాయి క‌దా. టైటిల్ ఎలా ఉన్నా ఓకే. ఆఖ‌రికి ఎక్స్‌.వై.జ‌డ్ పెట్టినా తేడా ఉండ‌దు. బుక్సింగ్ అవుతున్నాయా, లేదా అనేదే ప్ర‌ధానం” అంటూ వెరైటీ స‌మాధానం చెప్పాడు. క్రాంతి మాధ‌వ్ గురించి కూడా పెద్ద‌గా మాట్లాడ‌డానికి ఇష్ట‌ప‌డ‌డం లేదు. క్రాంతి మాధ‌వ్ గురించి ప్ర‌స్తావ‌న వ‌చ్చిన‌ప్పుడు.. ”రైట‌ర్‌గా ప్ర‌తిభావంతుడు. అంతే.. అంత‌కంటే ఇంకేం చెప్ప‌లేను” అంటూ లైట్ తీసుకున్నాడు విజ‌య్ దేవ‌ర‌కొండ‌.