ఎన్టీఆర్ 30వ సినిమాకి ఓ అంద‌మైన స‌మ‌స్య ఎదురైంది. ఈ సినిమాలో క‌థానాయిక‌గా ఎవ‌రిని ఎంపిక చేయాలి? అనే త‌ర్జ‌న భ‌ర్జ‌న‌లో ఉంది చిత్ర‌బృందం. ఎన్టీఆర్ – త్రివిక్రమ్ సినిమాకి సంబంధించిన అధికారిక ప్ర‌క‌ట‌న ఇటీవ‌లే వ‌చ్చేసింది. ఇది ఎన్టీఆర్ హీరోగా న‌టించే 30వ సినిమా. `ఆర్‌.ఆర్‌.ఆర్‌` త‌ర‌వాత ప‌ట్టాలెక్కే సినిమా ఇదే. క‌థానాయిక ఎవ‌ర‌నే విష‌యంలో చాలా రోజుల నుంచీ కస‌ర‌త్తు జ‌రుగుతూనే ఉంది. తొలుత ర‌ష్మిక పేరు బాగా వినిపించింది. ర‌ష్మిక సైతం ఓ సంద‌ర్భంలో, త్రివిక్రమ్ స‌మ‌క్షంలో.. `మీ సినిమాలో చేయాల‌నివుంది` అంటూ మ‌న‌సులోకి కోరిక బ‌య‌ట‌పెట్టింది. ఓ ద‌శ‌లో.. త్రివిక్రమ్ సినిమాలో ర‌ష్మిక ఎంపిక ఖాయం అనేసుకున్నారు.
అయితే స‌డ‌న్‌గా పూజా హెగ్డే రేసులోకి వ‌చ్చేసింది. ఎన్టీఆర్ – పూజాలది హిట్ కాంబినేష‌న్‌. అర‌వింద స‌మేత‌లో ఇద్ద‌రూ జంటగా క‌నిపించారు. త్రివిక్ర‌మ్‌కి కూడా పూజా బాగా క‌లిసొచ్చింది. అర‌వింద స‌మేత, అల వైకుంఠ‌పుర‌ములో సినిమాల్లో త‌నే నాయిక. సో.. ఆ సెంటిమెంట్‌కి ముచ్చ‌ట‌గా మూడోసారి కొన‌సాగించాల‌నుకుంటున్నాడు త్రివిక్రమ్. అయితే `భీష్మ` హిట్టుతో మ‌రోసారి ర‌ష్మిక పేరు మార్మోగిపోతోంది. భీష్మ నిర్మాత రాధాకృష్ణ త్రివిక్ర‌మ్‌కి బాగా క్లోజ్‌. హారిక హాసిని అంటే త్రివిక్రమ్ సినిమా కిందే లెక్క. ఎన్టీఆర్ – త్రివిక్రమ్ కాంబో కూడా హారిక హాసిని క్రియేష‌న్స్‌పైనే తెర‌కెక్కుతోంది. వాళ్లైతే… ర‌ష్మిక‌ని మ‌రోసారి రిపీట్ చేయాల‌ని భావిస్తున్నారు. అయితే.. హారిక‌లో ఏం చేసినా.. తుది నిర్ణ‌యం మాత్రం త్రివిక్ర‌మ్‌దే. ఆయ‌న ఓటు ఎవ‌రికి వేస్తాడు? అనేదే ముఖ్యం. త‌న‌కు అచ్చొచ్చిన హీరోయిన్‌ని మళ్లీ తీసుకుంటాడా, లేదంటే ఎన్టీఆర్ ప‌క్క‌న ఇప్ప‌టి వ‌ర‌కూ చేయ‌ని ర‌ష్మిక ని రంగంలోకి దింపుతాడా? అనేదే ఆస‌క్తిని రేకెత్తిస్తోంది.
