బాల‌కృష్ణ – బోయ‌పాటి శ్రీ‌ను కాంబినేష‌న్‌లో ఓ సినిమా ఇటీవ‌లే సెట్స్ పైకి వెళ్ళింది. మ‌రోవైపు బి.గోపాల్ తో ఓ చిత్రాన్ని తెర‌కెక్కించ‌డానికి సన్నాహాలు చేస్తున్నాడు బాల‌య్య. ఈ చిత్రం కోసం రెండు క‌థ‌లు రెడీ అయ్యాయి. ఓ క‌థ‌ని బుర్రా సాయిమాధ‌వ్ అందిస్తే.. మ‌రో క‌థ చిన్ని కృష్ణ రాశారు. ఈ రెండు క‌థ‌లూ బాల‌య్య‌కు బాగా న‌చ్చాయి. అయితే అందులో దేన్ని ఫైన‌ల్ చేస్తారో ఇంకా తెలీలేదు.
స‌మ‌ర‌సింహారెడ్డి, న‌ర‌సింహానాయుడు సినిమాల్ని బాల‌య్య అభిమానులు ఎప్ప‌టికీ మ‌ర్చిపోలేరు. తెలుగు నాట ఓ కొత్త చ‌రిత్ర సృష్టించిన చిత్రాల‌వి. ఆ క‌థ‌ల్ని అందించిన‌ది చిన్నికృష్ణ‌నే. ఇప్పుడు మ‌రోసారి ఓ శ‌క్తిమంత‌మైన క‌థ‌ని రాశార్ట. అయితే ఈసారి కుటుంబ బంధాలు, అనుబంధాలు, మాన‌వ సంబంధాల్ని అంత‌ర్లీనంగా ట‌చ్ చేయ‌బోతున్నార‌ని తెలుస్తోంది. మ‌రోవైపు బుర్రా సాయిమాధ‌వ్‌తోనూ బాల‌య్య‌కు మంచి అనుబంధ‌మే ఉంది. బాల‌య్య వందో చిత్రం గౌత‌మిపుత్ర శాత‌కర్ణికీ, ఎన్టీఆర్ బ‌యోపిక్‌ల‌కూ ప‌నిచేశారు బుర్రా. ఆయ‌న బాల‌య్య కోసం ఓ మాస్ క‌థ‌ని సిద్ధం చేశార్ట. ఈ రెండింటిలో ఒక‌టి ఫైన‌ల్ చేయ‌బోతున్నాడు బాల‌య్య. ఏ క‌థ ఓకే చేసినా.. ఈ మేలో చిత్రీక‌ర‌ణ మొద‌ల‌వుతుంద‌ని టాక్‌.
