నెంబర్ వన్ తెలుగు టీవీ చానల్ టీవీ9 లోగో మారిపోయింది. బ్లూ, రెడ్ కలర్ మీద.. టీవీ9 అనే లోగో ఉండేది. ఇప్పుడు దాని కింద.. తెలుగులో.. తెలుగు అని పెట్టి.. డిజైన్ మార్చారు. మౌలికంగా… రంగుల్లో కానీ.. డిజైన్‌లో కానీ వచ్చిన మార్పు.. టీవీ9 కింద.. తెలుగు అని పెట్టడమే. టీవీ లోగో వివాదం రవిప్రకాష్‌ను.. చానల్ నుంచి బయటకు పంపేసినప్పటి నుండి ఉంది. కొన్నాళ్ల క్రితం.. టీవీ9 మాజీ సీఈవో రవిప్రకాష్ ను పోలీసులు లోగో వివాదంలోనే కేసు పెట్టి అరెస్ట్ చేశారు. ” టీవీ9కి చెందిన లోగోలన్నింటినీ.. రూ. 99వేలకు మోజో టీవీ ఎండీ హరికిరణ్‌కు అమ్మేశారని..” ఆ కేసు సారాంశం. దానికి సంబంధించిన వివాదాలు .. సంబంధిత న్యాయస్థానాల్లో ఉన్నాయి. ఆ లోగోలు తనవేనని రవిప్రకాష్ వాదిస్తున్నారు.

లోగోలపై.. రవిప్రకాష్‌కు సంపూర్ణ హక్కులు ఉన్నాయన్న అభిప్రాయం మొదటి నుంచి ఉంది. ఓ వాదన.. కూడా గట్టిగానే వినిపిస్తోంది. ఎందుకంటే.. రవిప్రకాష్… ఏబీసీఎల్ వ్యవస్థాపక సభ్యుడు. వెంచర్ క్యాపిటలిస్ట్ అయిన శ్రీనిరాజు.. మొదట్లో పెట్టుబడి మాత్రమే పెట్టారు. ఆ సందర్భంగా చేసుకున్న అగ్రిమెంట్లలో మేథోపరమైన అంశాలపై.. అంటే.. లోగోల్లాంటివి.. తనకే హక్కులు ఉండేటట్లుగా… రవిప్రకాష్ ఒప్పందం చేసుకున్నారు. ఆ ప్రకారమే.. లోగోలను అమ్మేశారన్న వాదన రవిప్రకాష్ వర్గం వినిపిస్తోంది. ఈ వివాదాల్లో ఎప్పటికైనా.. లోగోలు.. రవిప్రకాష్‌కే చెందుతాయని నిపుణులు చెప్పడంతోనే..ఇప్పుడు టీవీ9 యాజమాన్యం కొత్త లోగోలను సిద్ధం చేసుకుందన్న అభిప్రాయం వినిపిస్తోంది.

ఒక వేళ నిజంగా.. టీవీ9 లోగో మారడానికి రవిప్రకాష్‌తో ఉన్న ఇబ్బందులే కారణం అయితే… తర్వాత ఎప్పుడైనా రవిప్రకాష్ మళ్లీ ఫాంలోకి వచ్చి కొత్త చానల్ ప్రారంభిస్తే.. దానికి టీవీ9 పాతలోగోని వాడితే మాత్రం.. టీవీ9 వర్సెస్ టీవీ9 తెలుగు అన్నట్లుగా పరిస్థితి మారిపోయే అవకాశం ఉంది. ఇప్పటికైతే రవిప్రకాష్ ..వైపు నుంచి చానల్ పెడతారో లేదో క్లారిటీ లేదు.