అభివృద్ధి చెందిన దేశాల సమూహం అయిన యూరప్… ఇప్పుడు కోవిడ్ వైరస్ దెబ్బకు విలవిల్లాడుతోంది. స్పెయిన్లో రోజూ వందల మంది చనిపోతున్నారు. అక్కడ కోవిడ్ కారణంగా ఆరు వేల మంది చనిపోయారు. రోజుకు సగటున 750 మరణాలు నమోదవుతున్నాయి. స్పెయిన్ రాకుమారి మరయా థెరెసా.. కరోనా వైరస్‌తో చనిపోయారు. ఆమె వయసు 86 సంవత్సరాలు ప్రజలకు చేరువగా ఉండే యువరాణిగా ఆమెకు మంచి పేరుంది. ఇప్పటికే క్వీన్ లెజీటియా క్వారంటైన్లో ఉన్నారు. ఉగ్రవాదంపై పోరుకు నియమితులైన స్పెయిన్ పోలీస్ ఫోర్స్ కీలక అధికారి జీసుస్ గయోసో రే.. కూడా ఆస్పత్రిలో చికిత్స పొందుతూ ప్రాణాలు వదిలారు.

స్పెయిన్ ప్రభుత్వం ఇప్పుడు ఆర్మీకి అత్యవసర అధికారాలు కట్టబెట్టింది. రోడ్లపై ఎవరూ తిరగకుండా లాక్ డౌన్ అమలు చేసే బాధ్యతను ఆర్మీకి అప్పగించారు. మృతదేహాలను మార్చురీల నుంచి ఇళ్లకు, అక్కడ నుంచి శ్మశాన వాటికలకు తరలించే సిబ్బంది కొరత ఉందని వైద్య ఆరోగ్య శాఖ గుర్తించింది. శవాల తరలింపు, వాటిని భద్ర పరచడం, ఫ్యూనరల్ సర్వీస్ నిర్వహించడం లాంటి బాధ్యతలు కూడా ఇప్పుడు స్పెయిన్ ఆర్మీకి అప్పగించారు. బ్రిటన్‌లో పరిస్థితి ఎలా ఉందో.. క్విన్ ఎలిజబెత్, ప్రిన్స్ చార్లెస్‌లతో పాటు.. ప్రధాని బోరిస్ జాన్సన్‌లకు వచ్చిన పాజిటివ్ రిజల్టే చెబుతోంది. అక్కడ అత్యంత దారుణంగా పరిస్థితులు ఉన్నాయి. మొత్తం లాక్ డౌన్ చేసేసినా.. కేసులు మాత్రం ఆగడం లేదు. అక్కడ మరణాలు అంతకంతూ పెరుగుతున్నాయి.

ఇటలీలో ఇప్పటికీ పరిస్థితి మెరుగుపడలేదు. వందల సంఖ్యలో రోజూ మరణాలు చోటు చేసుకుంటూనే ఉన్నాయి. యూరప్ దేశాల్లోని చిన్న పట్టణాలకు కూడా కరోనా వైరస్ వ్యాపించడంతో వారికి ఏం చేయాలో తెలియని పరి్సథితి ఏర్పడింది. ఎంత మందికి త్వరలో వైరస్ సోకుతుందో చెప్పలేని పరిస్థితి అందుకే లాక్ డౌన్‌ ను సీరియస్‌గా తీసుకోవాలని ప్రజలకు ప్రభుత్వాలు విజ్ఞప్తి చేస్తున్నాయి. ఆర్థికంగా బలమైన దేశాలుగా ఉన్న యూరప్ సమూహం..ఇప్పుడు చితికిపోయే పరిస్థితి ఏర్పడింది. ఈ వైరస్ ప్రభావంతో.. వారు ఆర్థిక నష్టాన్నే కాదు.. అత్యధికంగా ప్రాణనష్టాన్ని చవి చూస్తున్నారు.