వ‌ర్మ షాకులు ఇవ్వ‌డంలో దిట్ట‌. ఎప్పుడు ఎలాంటి అనూహ్య‌మైన నిర్ణ‌యాలు తీసుకుంటాడో చెప్ప‌లేం. ఏం చేసినా ఓ క్రేజీ ఫీలింగ్‌తో చేసేస్తాడు. అందుకే ఆర్జీవీ ఓ స‌మ్ థింగ్ స్పెష‌ల్ జీవి. త‌న‌కు సామాజిక బాధ్య‌త లేద‌న్న‌ది అంద‌రికీ తెలిసిన విష‌య‌మే. ఈ విష‌యాన్ని కాల‌ర్ ఎత్తుకుని మ‌రీ గ‌ర్వంగా చెబుతుంటాడు వ‌ర్మ‌. అయితే.. అదేంటో తెలీదుగానీ.. క‌రోనాపై పోరాటంలో త‌న వంతు సామాజిక బాధ్య‌తగా ఓ పాట రాసి, పాడి విడుద‌ల చేయ‌బోతున్నాడు. దీనికి సంబంధించిన ప్రోమో కూడా బ‌య‌ట‌కు వ‌దిలాడు.

అది ఒక్క పురుగు
క‌నిపించ‌ని పురుగు
క‌రోనా నీవొక పురుగు
న‌లిపేద్దామంటే అంత సైజులేదు దానికి
ప‌చ్చ‌డి చేద్దామంటే కండ‌లేదు దానికి
అదే దాని బ‌లం
అదే దాని ద‌మ్ము

అంటూ క‌రోనాపై ఓ పాట రాసేశాడు వ‌ర్మ‌. హార‌ర్ సినిమాలో బ్యాక్ గ్రౌండ్ స్కోరు టైపు వాయిద్యాల‌తో, ఫ్యాక్ష‌న్ సినిమాలో ఫైటింగుల సౌండింగుల‌తో పాడేశాడు వ‌ర్మ‌. ఈ పాట పాడుతున్న‌ప్పుడు వ‌ర్మ ఇచ్చిన హావ‌భావాలు మీరు గ‌మ‌నించాల్సిందే. క‌రోనాని ఈ పాట‌తోనే చంపేద్దాం అన్న క‌సి వ‌ర్మ గొంతులో క‌నిపించిదంటే న‌మ్మండి. వ‌ర్మ పాట‌తో అప్పుడే సోష‌ల్ మీడియాలో సెటైర్లు మొద‌లైపోయాయి. వ‌ర్మ పాట విని క‌రోనా చ‌చ్చిపోవ‌డం గ్యారెంటీ అంటూ సెటైర్లు వేసుకుంటున్నారు. ప్రోమోనే ఇలా ఉందంటే.. ఇక పూర్తి పాట ఎలా ఉంటుందో. ర‌క్త‌పాతాలే ఇక‌.