ఆంధ్రప్రదేశ్‌లో భారతీయ జనతా పార్టీకి లేనిపోని క్రెడిట్ కట్టబెట్టేందుకు తెలుగుదేశం పార్టీ విశ్వ ప్రయత్నం చేస్తోంది. తమ పార్టీ కోసం.. ఇంత కాలం కష్టపడ్డారేమో కానీ.. ఆ పార్టీ నేతలు ఇప్పుడు.. బీజేపీ కోసం శ్రమిస్తున్నారు. అసలు విషయం ఏమిటంటే.. కరోనా సాయం కింద… బియ్యం కార్డులు ఉన్న వారికి ఏపీ ప్రభుత్వం రూ. వెయ్యి పంపిణీ చేస్తోంది. దీన్ని జగన్మోహన్ రెడ్డి ఇస్తున్నారని చెబుతూ… వాలంటీర్లు కూడా కాకుండా.. వైసీపీ స్థానిక సంస్థల ఎన్నికల్లో పోటీ చేస్తున్న వారే పంపిణీచేస్తున్నారు. దీనిపై టీడీపీ నేతలు మండి పడుతున్నారు. ఇదంతా కేంద్ర సాయం అని..జగన్మోహన్ రెడ్డి ఇస్తున్నారని ఎలా చెబుతారని ప్రశ్నిస్తున్నారు. సోషల్ మీడియాలో అదే పనిగా… ఇది మోడీ ఇస్తున్న సొమ్ము అనిచెప్పేందుకు ప్రయత్నిస్తున్నారు. నేరుగా విమర్శలు చేస్తున్నారు . కేంద్ర సాయాన్ని తన సాయంగా ఎలా చెప్పుకుంటారని అంటున్నారు.
అయితే.. ఇదంతా టీడీపీ నేతల ఘోషే కానీ బీజేపీ నేతలు మాత్రం నోరు మెదపడం లేదు. ఏపీ బీజేపీ అధ్యక్షుడు కన్నా లక్ష్మినారాయణ.. ఓ ట్వీట్ చేసి.. సైలెంటయిపోయారు.కేంద్ర సాయాన్ని జగన్ పేరుతో పంచడాన్ని ఆయన ఖండించారు. అయితే.. బీజేపీ తరపున టీడీపీ నేతలే వకాల్తా పుచ్చుకున్నారు. అదే పనిగా మోడీకి దక్కాల్సిన క్రెడినట్ జగన్ తీసుకుంటున్నారని.. వాదించడం ప్రారంభించారు. కరోనా సాయం నిజానికి కేంద్రం ఏమీ ఇవ్వడం లేదు. విపత్తు నిధులు మాత్రం దండిగా ఇచ్చింది.
వాటి నుంచే.. ఏపీ ప్రభుత్వం.. సాయం పంపిణి చేస్తోంది. కేంద్రం జన్ ధన్ ఖాతాలు ఉన్న వారికి విడిగా నెలకు రూ. ఐదు వందలు అకౌంట్లలో వేస్తోంది. కానీ ప్రజలకు రూ. వెయ్యి పంచాలని ఎక్కడా చెప్పలేదు. విపత్తు నిధులను వాడుకునే అవకాశం ఉండటంతో రాష్ట్ర ప్రభుత్వాలే.. ఈ నిధులు ఇలా ఉపయోగించుకుంటున్నాయి. బీజేపీకి క్రెడిట్ దక్కినా పర్వాలేదు కానీ… వైసీపీకి మాత్రం దక్కకూడదని.. టీడీపీ నేతలు.. బీజేపీకిమద్దతుగా ప్రచారం చేయడం ప్రారంభించారు.
