కరోనా మహమ్మారిపై ప్రపంచం అంతా పోరాడుతోంది. ఎంత నష్టం జరుగుతోందో.. అంత అసహనం దేశాల్లో.. ప్రజల్లో కనిపిస్తోంది. అదంతా చైనా వైపు మళ్లుతోంది. కరోనా వైరస్ అక్కడే పుట్టిందనే బలమైన నమ్మకంతో పాటు… బయోవార్‌లో భాగంగా ఆ దేశమే సృష్టించిందనే ఆరోపణలు రావడం కూడా.. మరో కారణం. అమెరికా అధ్యక్షుడు డొనాల్డ్ ట్రంప్ అయితే ఇది చైనీస్ వైరస్ అంటూ ప్రచారం చేసేస్తున్నారు. చైనా మీద చర్యలు తీసుకోవాలంటూ ఆస్ట్రేలియా ప్రధాని డబ్ల్యూహెచ్ఓను కోరారు. మరికొన్ని దేశాలు చైనాపై గుర్రుగా ఉన్నాయి. వీరితో పాటు సాధారణ ప్రజలు కూడా.. సోషల్ మీడియాలో చైనా యాప్‌లకు వ్యతిరేకంగా ప్రచారం ప్రారంభించారు. వాటిని ఫోన్ల నుంచి తీసేయాలని ఉద్యమం ప్రారంభించారు.

కరోనా వైరస్ ఎఫెక్ట్ ముఖ్యంగా రెండు చైనా యాప్ ల మీద ప్రముఖంగా కనిపిస్తోంది. ముఖ్యంగా టిక్‌టాక్, జూమ్ యాప్ మీద ఈ ఎఫెక్ట్ ఎక్కువగా కనిపిస్తోంది. ఈ యాప్ ల బ్యాన్ కు సంబంధించి సోషల్ మీడియా వేదికగా భారీ చర్చే జరుగుతోంది. బ్యాన్ టిక్ టాక్ అంటూ హ్యాష్ ట్యాగ్ తో జోరుగా నెటిజన్ల మధ్య చర్చ జరుగుతోంది. ఆ దేశ ప్రొడక్ట్స్ అన్నింటినీ బ్యాన్ చేద్దాం అంటూ ఇంకొందరు గళం విప్పుతున్నారు. ఒకే రోజు పదివేలకు పైగా హ్యాష్ ట్యాగ్ లు వచ్చాయంటే పరిస్థితి ఎలా ఉందో అర్థం చేసుకోవచ్చు.

తమ ఫోన్‌లో యాప్ డిలీట్ చేయడమే కాదు… ఈ విషయాన్ని సోషల్ మీడియా వేదికగా ప్రచారం చేస్తున్నారు. ఈ వ్యతేరికతను తగ్గించుకోవడానికో ఏమో కానీ.. టిక్ టాక్ మాత్రం ఇండియాకు వంద కోట్ల సాయం చేసింది. 100 కోట్ల విలువైన 4లక్షల మెడికల్ ప్రొటెక్టివ్ సూట్లు, 2లక్షల మాస్కులను భారత్‌లోని డాక్టర్లు, హెల్త్ వర్కర్లకు అందించింది. చైనా ఉత్పత్తులు.. యాప్‌లు బహిష్కరించాలంటూ.. సోషల్ మీడియాలో జరుగుతున్న ప్రచారం… ఎంత మేరకు సక్సెస్ అవుతుందో వేచి చూడాలి. ఎందుకంటే.. భారతీయుల చేతుల్లో ఉన్న ఫోన్లలో 90 శాతం.. చైనా తయారీవే ఉంటాయి. ప్రతీదానికి చైనాపై ఆధారపడటం ఎప్పటి నుండో ప్రారంభమయిది. దీన్ని అధిగమించి.. ఆ దేశం వస్తువులను ఇండియా బహిష్కరిస్తే.. గొప్ప పట్టుదలను ప్రదర్శించినట్లే.