వినోద రంగం మొత్తం ఓటీటీ వేదిక వైపు దృష్టి మ‌ర‌ల్చింది. వెబ్ సిరీస్‌ల నిర్మాణం ఊపందుకుంది. భ‌విష్య‌త్తులో ఓటీటీ సంస్థ‌ల‌దే రాజ్యం అంటూ అగ్ర నిర్మాత‌లు కూడా ఢంకా బ‌నాయించి మ‌రీ చెబుతున్నారు. ప్ర‌ముఖ ద‌ర్శ‌కులు సైతం ఓటీటీ కోసం ప‌నిచేయ‌డానికి రెడీ అవుతున్నారు. క్రిష్ హాట్ స్టార్ కోసం ఓ వెబ్ సిరీస్ రూపొందిస్తున్నారు. ఇప్పుడు తేజ కూడా ఈ జాబితాలో చేరిన‌ట్టు తెలుస్తోంది. హాట్ స్టార్ కోసం తేజ కొన్ని వెబ్ సిరీస్‌లు తెర‌కెక్కించే పనిలో ఉన్నార‌ని టాక్‌. మూడు వెబ్ సిరీస్‌ల కోసం అమేజాన్ తేజ‌తో ఒప్పందం కుదుర్చుకుంద‌ని తెలుస్తోంది. అమేజాన్ త్వ‌ర‌లోనే సినిమా నిర్మాణ రంగంలోనూ అడుగుపెట్ట‌బోతోంది. తేజ‌తోనే ఓ సినిమా ప్లాన్ చేస్తోంది. ఇందుకు సంబంధించిన అధికారిక ప్ర‌క‌ట‌న రావాల్సివుంది. ప్ర‌స్తుతం రెండు స్క్రిప్టుల ప‌నిలో ఉన్నారు తేజ‌. గోపీచంద్ కోసం ఓ క‌థ‌, రానా కోసం మ‌రో క‌థ రెడీ చేస్తున్నారు. ఆ త‌ర‌వాతే అమేజాన్ వ‌ర్క్ మొద‌ల‌వుతుందా? లేదంటే ముందే వెబ్ సిరీస్‌ల‌ను నిర్మిస్తారా? అనేది తెలియాల్సివుంది.