దిల్ రాజు .. రెండో పెళ్లి గురించి ఫిల్మ్ ఇండస్ట్రీలో చాలా రోజులుగా చర్చ జరుగుతోంది. నిప్పు లేనిదే పొగ రాదన్నట్లుగా.. దిల్ రాజు కూడా.. చాలా సార్లు మౌనమే పాటించారు. అయితే.. హీరోయిన్లతో లింకులు పెట్టి.. ఫలానా హీరోయిన్‌తోనే పెళ్లి అని ప్రచారం జరిగినప్పుడు మాత్రం ఖండించారు. అప్పుడే చాలా మందికి అర్థమయింది.. దిల్ రాజు రెండో పెళ్లి ఖాయమని. అప్పటికీ అనేక రూమర్లు ప్రచారం జరుగుతూనే ఉన్నాయి. ఇప్పటికి రెండో పెళ్లి రూమర్ నిజమయింది. నిజామాబాద్ జిల్లాలోని స్వగ్రామంలో తాను కట్టించిన వెంకటేశ్వరస్వామి గుడిలోనే.. రెండో పెళ్లి చేసుకున్నారు నిర్మాత దిల్ రాజు.

ఆదివారమే తన పెళ్లి జరగబోతోందని.. తన నిర్మాణ సంస్థ ట్విట్టర్ అకౌంట్ ద్వారా.. పరోక్షంంగా ప్రకటించిన దిల్ రాజు పెళ్లి తర్వాత ఫోటోలు కూడా మీడియాకు విడుదల చేశారు. దిల్ రాజు పెళ్లి చేసుకున్న యువతి గతంలో ఎయిర్ హోస్టెస్‌గా పని చేసిందని చెబుతున్నారు. దిల్ రాజు అసలు పేరు వి.వెంకట రమణా రెడ్డి. ఆయన పెళ్లి చేసుకున్న యువతి పేరు తేజస్విని. అయితే.. ఆస్ట్రాలజీ నమ్మకాల ప్రకారం.. పెళ్లి చేసుకునే ముందే దిల్ రాజు ఆమె పేరును వ్యాఘా రెడ్డిగా మార్చినట్లుగా తెలుస్తోంది.

దిల్ రాజు భార్య 2017లో మృతి చెందారు. భార్య మృతి చెందే నాటికి దిల్ రాజు వయసు 46 ఏళ్లు మాత్రమే. ఆ దంపతులకు ఒక్కరే కుమార్తె. ఆమె పెళ్లి కూడా… భార్య మరణించకముందే చేసేశారు దిల్ రాజు. దాంతో ఒంటరి అయిపోయారు. ఒక్క కుమార్తెకు పెళ్లి అయిపోవడం.. భార్య చనిపోవడంతో… ఆయన ఒంటరైపోయారు. శ్రేయోభిలాషులందరితో పాటు.. కుమార్తె కూడా.. మళ్లీ పెళ్లి చేసుకోమని ప్రోత్సహించడంతో.. మనసుకు నచ్చిన అమ్మాయిని దిల్ రాజునే సెలక్ట్ చేసుకున్నట్లుగా తెలుస్తోంది.