వెట‌రన్ ద‌ర్శ‌కులు మ‌ళ్లీ మెగాఫోన్ ప‌ట్ట‌డానికి రెడీ అవుతున్నారు. సింగీతం శ్రీ‌నివాస‌రావు ఓ సినిమా చేయ‌డానికి సన్నాహాల్లో ఉన్నారు. ఇప్పుడు శివ నాగేశ్వ‌ర‌రావు కూడా బ‌రిలో దిగుతున్నారు. `మ‌నీ` సినిమాతో పేరు తెచ్చుకున్నారు శివ నాగేశ్వ‌ర‌రావు. సిసింద్రీ, వ‌న్ బై టూ, ప‌ట్టుకోండి చూద్దాం లాంటి హిట్ చిత్రాలు శివ నాగేశ్వ‌ర‌రావు ఖాతాలో ఉన్నాయి. చాలా కాలం త‌ర‌వాత ఇప్పుడు మ‌ళ్లీ ఆయ‌న కెప్టెన్ కుర్చీలో కూర్చోబోతున్నారు. గ‌త కొంత‌కాలంగా స్క్రిప్టుల ప‌నిలో ఉన్నారాయ‌న‌. రెండు మూడు క‌థ‌లు రెడీ చేసుకున్నారు. అందులో ఓ క‌థ‌ని ప‌ట్టాలెక్కిస్తున్నారు. శివ నాగేశ్వ‌ర‌రావు రాసిన మ‌రో క‌థ‌తో ఓ ద‌ర్శ‌కుడు సినిమా తీస్తున్నార‌ని స‌మాచారం. అందులో ఓ అగ్ర క‌థానాయ‌కుడు న‌టిస్తార‌ని తెలుస్తోంది. శివ నాగేశ్వ‌ర‌రావుపై హాలీవుడ్ సినిమాల ప్ర‌భావం ఎక్కువ‌. ఈసారి కూడా హాలీవుడ్ ట‌చ్‌లోనే క‌థ‌లు సిద్ధం చేశార‌ట‌. ద‌ర్శ‌కుడిగా, క‌థా ర‌చ‌యిత‌గా శివ నాగేశ్వ‌ర‌రావు చేయ‌బోతున్న సినిమాలేమిట‌న్న‌వి త్వ‌ర‌లోనే తెలుస్తుంది. అంతేకాదు.. ఓ ఓ టీ టీ సంస్థ కూడా వెబ్ సిరీస్ కోసం శివ నాగేశ్వ‌ర‌రావుని సంప్ర‌దించింద‌ని టాక్‌. మొత్తానికి ఓ టీ టీ పుణ్య‌మా అని సీనియ‌ర్ ద‌ర్శ‌కులకూ బోలెడంత ప‌ని దొరుకుతోంది,