లాక్ డౌన్ స‌మ‌యాన్ని సంపూర్ణంగా స‌ద్వినియోగం చేసుకున్న ద‌ర్శ‌కుల‌లో అనిల్ రావిపూడి ఒక‌రు. సొంత ఊరిలో ఉంటూనే `ఎఫ్ 3` సినిమా స్క్రిప్టుని పూర్తి చేసేశాడు. షూటింగుల‌కు ఎప్పుడు అనుమ‌తి వ‌స్తే అప్పుడు సినిమాని ప‌ట్టాలెక్కించ‌డానికి రెడీ అయ్యాడు. అయితే ఈలోగా మ‌రో వార్త చ‌క్క‌ర్లు కొడుతోంది. ఎఫ్ 3 కంటే ముందు బాల‌కృష్ణ‌తో అనిల్ రావిపూడి ఓ సినిమా చేస్తాడ‌ని, అందుకు స‌న్నాహాలు జ‌రుగుతున్నాయ‌ని చెప్పుకుంటున్నారు. బాల‌య్య‌తో ఓసినిమా చేయాల‌ని అనిల్ రావిపూడి ఇది వ‌ర‌కే అనుకున్నాడు. `రామారావు గారు` అనే స్క్రిప్టు త‌న ద‌గ్గ‌ర రెడీగా ఉంది. అందుకే ఈ వార్త‌ల‌కు ఊతం వ‌చ్చింది.

కానీ అనిల్ రావిపూడి ఆలోచ‌న‌లు వేరుగా ఉన్నాయి. త‌న దృష్టంతా ఇప్పుడు ఎఫ్ 3 త‌ర‌వాతే. ఈ సినిమాని ముందు ప‌ట్టాలెక్కించి పూర్తి చేశాకే మ‌రో సినిమా జోలికి వెళ్తానంటున్నాడు. వ‌రుస విజ‌యాల‌తో అనిల్ బిగ్ లీగ్‌లోకి చేరిపోయాడు. ఎఫ్ 3నీ హిట్ చేసేస్తే.. త‌న స్థానం మ‌రింత బ‌ల‌ప‌డుతుంది. అందుకే ఎఫ్ 3పై గురి పెట్టాడు. వెంక‌టేష్‌, వ‌రుణ్ తేజ్‌ల‌తో పాటు మ‌రో క‌థానాయ‌కుడికీ ఈ సినిమాలో చోటుంది. కాక‌పోతే అది అతిథి పాత్ర మాత్ర‌మే. ఆ హీరోని ఫిక్స్ చేసుకోవ‌డంలో రావిపూడి త‌ల‌మున‌క‌లై ఉన్నాడు. బాల‌య్య‌తో అనిల్ త‌ప్ప‌కుండా సినిమా చేస్తాడ‌ని, అయితే దానికి ఇంకా టైమ్ ఉంద‌ని ఆయ‌న సన్నిహితులు తెలిపారు.