ఆంధ్రప్రదేశ్ ప్రభుత్వం ఎజెండాగా పెట్టుకుని మరీ కేసులు పెడుతుందో.. అలా జరిగిపోతున్నాయో కానీ.. తమకు వ్యతిరేకంగా ఉన్నారని అనుకుంటున్న వారందరిపైనా కేసులతో ఎదురుదాడి చేస్తోంది. సోషల్ మీడియాలో పోస్టులు పెట్టే పెట్టే కార్యకర్తల దగ్గర్నుంచి మీడియాలో వ్యతిరేక కథనాలు ప్రసారం చేసే.. టీవీ చానల్స్ వరకూ దేన్నీ వదిలి పెట్టడం లేదు. తాజాగా టీవీ5 చైర్మన్ బీఆర్ నాయుడు, ఆ చానల్ యాంకర్ మూర్తిలపై కేసు పెట్టినట్లుగా వెలుగులోకి వచ్చింది. టీవీ5లో కొన్నాళ్ల కిందట… యూనివర్శిటీల పాలక మండళ్ల నియామకాల గురించిన వార్త వచ్చింది.
ఆ వార్తలో.. ఓ నోట్ ఫైల్ లాంటిదాన్ని చూపించారు. ఆ నోట్ ఫైల్.. రహస్యం అని.. దాన్ని టీవీ5 దొంగింలించడమో.. ఫోర్జరీ చేయడమో జరిగిందని.. దీనిపై విచారణ జరపాలని కోరుతూ.. ఉన్నత విద్యాశాఖను చూస్తున్న సతీష్ చంద్ర అనే ఉన్నతాధికారి ఫిర్యాదు చేశారు. వెంటనే… పోలీసులు కేసు నమోదు చేశారు. ఈ కేసులో ఏ వన్ గా శ్రావణ్ కుమార్ అనే లాయర్‌ను చూపించారు. ఏ 2గా టీవీ 5 చైర్మన్ బీఆర్ నాయుడు.. ఏ 3గా… ఈ వార్తను ప్రజెంట్ చేసిన.. మూర్తి ఉన్నారు. ఈ కేసులు పెట్టడానికి గతంలో విడుదల చేసిన.. మీడియా జీవోను ప్రాతిపదికగా తీసుకున్నారు. ఎలాగైనా టీవీ5ని టార్గెట్ చేయాలనుకున్నట్లుగా.. కొన్ని రోజులుగా వ్యవహరిస్తున్నారు వైసీపీ నేతలు. ఇప్పుడు అవకాశం దొరికినట్లయింది.
ఈ వార్తను ప్రసారం చేసి నెల దాటిపోయింది. అయినా ఇప్పుడే ఎందుకు కేసు పెట్టారో.. సులువుగానే అర్థం చేసుకోవచ్చు. అసలు ఈ కేసులో విషయం ఏమిటంటే.. ఆ వార్తను తప్పు అని చెప్పడం లేదు. తన శాఖలోని నోట్ ఫైల్ బయటకు వెళ్లింది.. వాళ్లకు ఎలా వెళ్లింది.. అన్నదానిపైనే సతీష్ చంద్ర ఫిర్యాదు చేశారు. అమరావతిలో ఉండే ఉన్నత విద్యాశాఖ కార్యాలయానికి టీవీ5 చైర్మన్, యాంకర్ వెళ్లి.. ఎలా తీసుకొస్తారని భావించారో మరి..! . కొద్ది రోజుల క్రితం మూర్తిని అరెస్ట్ చేసేందుకు సీఐడీ బృందాలు హైదరాబాద్ కు వచ్చాయని ప్రచారం జరిగింది. ఈ కేసు ద్వారా అరెస్ట్ ను నిజం చేస్తారేమో..?
