మ‌హేష్‌బాబు – పరశురామ్ కాంబినేష‌న్‌లో ఓ సినిమా తెర‌కెక్కుతోంది. లాక్ డౌన్ ఎత్తేశాక… మ‌హేష్ చేయ‌బోయే సినిమా ఇదే. క‌థ పూర్త‌య్యింది. ఈ సినిమా కోసం `స‌ర్కారు వాటి పాట` అనే టైటిల్ ప‌రిశీల‌న‌లో ఉంది. దాదాపుగా ఈ టైటిలే ఖాయం అయ్యే సూచ‌న‌లు క‌నిపిస్తున్నాయి.
ఓ సామాజిక అంశాన్ని క‌థ‌గా తీసుకుని, మ‌హేష్ ఇమేజ్‌కి త‌గ్గ‌ట్టు ఈ స్క్రిప్టు త‌యారు చేశాడు పరశురామ్. బ్యాంకుల ద‌గ్గ‌ర వేల కోట్లు అప్పు తీసుకుని విదేశాల‌కు చెక్కేసే బ‌డా బాబుల బాగోతాల చుట్టూ సాగే క‌థ ఇదని ముందు నుంచీ ప్ర‌చారం జ‌రుగుతోంది. అయితే టైటిల్ బ‌ట్టి చూస్తే మాత్రం ఇదో పొలిటిక‌ల్ సెటైర్ అనిపిస్తోంది. దీన్ని బ‌ట్టి చూస్తుంటే, పరశురామ్ క‌థ‌లో కొన్ని కీల‌క‌మైన మార్పులు చేసిన‌ట్టు అర్థం అవుతోంది. నిజానికి ఈ క‌థ ప‌ట్టుకుని ఎప్పుడో మ‌హేష్ ద‌గ్గ‌ర‌కు వెళ్లాడు పరశురామ్. ఆ స‌మ‌యంలోనే మ‌హేష్ కొన్ని మార్పులు సూచించాడు. ఇవ‌న్నీ దృష్టిలో ఉంచుకుని పరశురామ్ క‌థ‌ని కాస్త మార్చిన‌ట్టు అనిపిస్తోంది. పొలిటిక‌ల్ డ్రామాల‌కు ఇప్పుడు మంచి గిరాకీ ఉంది. మ‌హేష్ చేసిన `భ‌ర‌త్ అనే నేను` పొలిటిక‌ల్ డ్రామానే. అప్పులు ఎగ్గొట్టే వ్యాపార వేత్త‌ల క‌థ‌ని కాస్త పొలిటిక‌ల్ సెటైర్‌డ్రామాగా మార్చేశాడు పరశురామ్. మ‌రి ఫ‌లితం ఎలా ఉంటుందో చూడాలి.
