క‌రోనాపై సినిమా తీసేశాన‌ని ప్ర‌క‌టించాడు రాంగోపాల్ వ‌ర్మ‌. ఆ సినిమా టీజ‌ర్‌కూడా విడుద‌ల చేసి అంద‌రికీ షాక్ ఇచ్చాడు. వ‌ర్మ ప‌నుల‌న్నీ ఇలానే ఉంటాయి. గ‌ప్‌చుప్‌గా సినిమా లాగించేయ‌గ‌ల‌డు. ఈసారీ అదే ప‌ని చేశాడు. అయితే ఈలోగా క‌రోనాపై మ‌రో సినిమా త‌యార‌వుతోంద‌న్న విష‌యం బ‌య‌ట‌కు వ‌చ్చింది. `అ`తో అంద‌రినీ ఆక‌ట్టుకున్న ప్ర‌శాంత్ వ‌ర్మ ఈ చిత్రానికి ద‌ర్శ‌కుడు. రేపు… అంటే శుక్ర‌వారం ఈ సినిమాకి సంబంధించిన టీజ‌ర్ కూడా విడుద‌ల అవుతోంది. నిజానికి వ‌ర్మ కంటే క‌రోనాపై సినిమా మొద‌లెట్టింది ప్ర‌శాంత్ వ‌ర్మ‌నే. క‌రోనా ప్ర‌భావం మ‌న దేశంలో అంత‌గా లేక మునుపే ప్ర‌శాంత్ వ‌ర్మ క‌థ రాసుకుని షూటింగ్ కూడా మొద‌లెట్టాడ‌ట‌. లాక్ డౌన్ ప్ర‌క‌టించ‌క‌మునుపే దాదాపు 40 శాతం చిత్రీక‌ర‌ణ పూర్త‌యింద‌ని తెలుస్తోంది. లాక్‌డౌన్‌లో వ‌ర్మ సినిమా షూటింగ్ మొద‌లెట్టాడు కాబ‌ట్టి. క‌రోనాపై మొట్ట మొద‌టగా ఓసినిమాని ప్రారంభించిన ఘ‌న‌త ప్ర‌శాంత్ వ‌ర్మ‌కే క‌ట్ట‌బెట్టాలి. అయితే.. ఈ రెండు సినిమాల్లో ఎవ‌రి సినిమా ముందు బ‌య‌ట‌కు వ‌స్తుందో చూడాలి.