టాలీవుడ్ Vs నంద‌మూరి బాల‌కృష్ణ కాస్తా.. నాగ‌బాబు Vs బాల‌కృష్ణ‌గా మారింది. బాల‌య్య బాబు నోరు జార‌డం ఏమో గానీ.. వెంట‌నే వాటిపై ఘాటు వ్యాఖ్య‌లు చేస్తూ.. కామెంట్లు దంచి కొడుతూ, బాల‌య్య‌కు ఇండైరెక్టుగా వార్నింగులు లాంటివి ఇస్తూ… నాగ‌బాబు ఓ వీడియో వ‌ద‌ల‌డంతో అగ్నిలో ఆజ్ఞం పోసిన‌ట్టైంది. నాగ‌బాబు ఎంట్రీతో.. ఈ వివాదం ఇంకాస్త ముదిరింది.

అయితే నాగ‌బాబు కూడా వెంట‌నే న‌ష్ట‌నివార‌ణ‌లో దిగిపోయాడు. తాజా వీడియోల త‌ర‌వాత ఓ మీడియా ఛాన‌ల్ తో మాట్లాడుతూ బాల‌య్య‌తో త‌న‌కు వ్య‌క్తిగ‌తంగా ఎలాంటి శత్రుత్వం లేద‌ని, త‌న‌పై ద్వేషంతోనో, కోపంతోనో ఆ వ్యాఖ్య‌లు చేయ‌లేద‌ని, ప‌రిశ్రమ వ్య‌క్తిగా, పరిశ్ర‌మ‌పై ప్రేమ‌తోనే స్పందించాన‌ని పేర్కున్నారు. ఇది వ‌ర‌కు బాల‌య్య‌ని ఓ హాస్య‌న‌టుడిగా అభివ‌ర్ణించాడు నాగ‌బాబు. దానిపై కూడా స్పందించాడు. హాస్య‌న‌టుడు అంటే త‌ప్పేంటి? హాస్యం కూడా ఓ న‌ట‌నే క‌దా.. అది ఓ కాంప్లిమెంట్ అంటూ స‌వ‌ర‌ణ ఇచ్చుకున్నాడు. అయితే “భూములు పంచుకోవడం” అని బాల‌య్య వ్యాఖ్యానించ‌డం మాత్రం హ‌ర్షించ‌ద‌గిన‌ది కాద‌ని చెప్పుకొచ్చాడు. బాల‌య్య‌ని ఎందుకు పిల‌వ‌లేదో త‌న‌కు తెలీద‌ని, ఒక‌వేళ పిల‌వ‌క‌పోతే… సంబంధిత వ్య‌క్తుల్ని బాల‌య్య ప్ర‌శ్నించొచ్చ‌ని, అయితే ఇలాంటి ఘాటైన వ్యాఖ్య‌లు చేయ‌డం క‌రెక్టు కాద‌న్నారు.