టాలీవుడ్ కి పాన్ ఇండియా మోజు ప‌ట్టుకుంది. అయితే.. పాన్ ఇండియా ప్రాజెక్టు అంత ఈజీ కాదు. బోలెడ‌న్ని హంగులుండాలి. అన్ని భాష‌ల‌కూ, అన్ని ప్రాంతాల‌కూ న‌చ్చే క‌థ‌లు ఎంచుకోవాలి. దానికి త‌గ్గ‌ట్టు స్టార్ల కూర్పు ఉండాలి. క‌న్న‌డం, త‌మిళం, మ‌ల‌యాళం, హిందీ.. ఇలా అన్ని భాష‌ల్లోంచీ న‌టీన‌టుల్ని ఎంచుకోవాలి. లేదంటే దానికి పాన్ ఇండియా షేపు రాదు. ‘పుష్ష‌’ కూడా పాన్ ఇండియా సినిమానే. ఈ చిత్రాన్ని దేశ వ్యాప్తంగా విడుద‌ల చేద్దామ‌నుకుంటున్నారు. అందుకే ఇప్పుడు వివిధ భాషా చిత్ర‌సీమ‌ల నుంచి స్టార్ల‌ని ఎంచుకునే ప‌నిలోప‌డింది సుకుమార్ టీమ్. క‌న్న‌డ‌, మ‌ల‌యాళం, హిందీ నుంచి ఒక్కో స్టార్‌ని ఈ సినిమా కోసం తీసుకొస్తార‌ని తెలుస్తోంది. ఆల్రెడీ త‌మిళం నుంచి విజ‌య్ సేతుప‌తి లైన్లో ఉన్నాడు. మిగిలిన మూడు భాష‌ల్లోంచి ఎవ‌రెవ‌రు వ‌స్తార‌న్న‌ది తెలియాల్సివుంది. ఈ సినిమాలో ఓ ప‌వ‌ర్‌ఫుల్ లేడీ పాత్ర ఉన్న‌ట్టు తెలుస్తోంది. ‘రంగ‌స్థ‌లం’లో రంగ‌మ్మ‌త్త‌లా ఈ పాత్ర గుర్తుండి పోతుంద‌ట‌. ఆ పాత్ర కోసం ఓ బాలీవుడ్ నటీమ‌ణి పేరు ప‌రిశీలిస్తున్నారు. త్వ‌ర‌లోనే ఒకొక్క‌రి పేరూ రివీల్ చేసి.. సర్‌ప్రైజ్ చేయాల‌ని పుష్ష టీమ్ భావిస్తోంది.