లాక్ డౌన్ నుంచి షూటింగుల‌కు అనుమ‌తులు వ‌చ్చాయి. కానీ ఇప్ప‌టి వ‌ర‌కూ ఒక‌ట్రెండు చిన్న సినిమాలు త‌ప్ప…. ఏ సినిమా సెట్స్‌పైకి వెళ్ల‌లేదు. అగ్ర హీరోలెవ‌రూ షూటింగుల‌కు ఆస‌క్తి చూపించ‌క‌పోవ‌డంతో అనుకున్న మేర‌కు షూటింగులు మొద‌ల‌వ్వ‌లేదు. అయితే… స్టార్ హీరోల్లో అల్లు అర్జున్ ఇప్పుడు ముంద‌డుగు వేశాడు. త‌న కొత్త సినిమా `పుష్ప` షూటింగ్‌కి బ‌న్నీ రెడీ అవుతున్నాడు. మ‌హ‌బూబ్ న‌గ‌ర్ అడ‌వుల్లో ఈ సినిమా కోసం ఓ ప్ర‌త్యేక‌మైన సెట్ తీర్చిదిద్దే స‌న్నాహాల్లో ఉన్నారు ద‌ర్శ‌క నిర్మాత‌లు. ఈలోగా రామోజీ ఫిల్మ్ సిటీలో ఈ సినిమా కోసం మ‌రో సెట్ వేస్తున్నారు. అందులో ఓ పాట తెర‌కెక్కిస్తారు. బ‌న్నీ, ర‌ష్మిక‌ల‌పై డ్యూయెట్ తోనే `పుష్ప` షూటింగ్ మొద‌లు పెట్ట‌బోతున్నట్టు స‌మాచారం. ప‌రిమిత‌మైన క్రూతో షూటింగులు మొద‌లెట్టాల‌న్న నిబంధ‌న‌లు ఉండ‌డంతో ముందుగా పాట‌ల్ని పూర్తి చేయాల‌ని సుకుమార్ భావిస్తున్నాడు. ఇప్ప‌టికే దేవిశ్రీ ప్ర‌సాద్ నాలుగు పాట‌ల్ని కంపోజ్ చేసి రెడీగా పెట్టాడు. అందుకే ముందు పాట‌ల ప‌ని ప‌ట్టాల‌న్న‌ది ప్లాన్‌. జులై మొద‌టి వారంలో `పుష్ప` కొత్త షెడ్యూల్ మొద‌ల‌య్యే అవ‌కాశం ఉంది.
పాట‌ల ప‌ని పూర్తి చేయాల‌నుకుంటున్న ‘పుష్ప’
