ప్ర‌భాస్ – రాధాకృష్ణ కాంబినేష‌న్‌లో ఓ సినిమా తెర‌కెక్కుతోంది. `రాధే శ్యామ్‌` పేరు దాదాపు ఖ‌రారైపోయింది. లాక్ డౌన్ వ‌ల్ల అన్ని సినిమాలూ ఆగిపోయిన‌ట్టే.. ఇదీ ఆగిపోయింది. అయితే.. షూటింగుల‌కు ఇప్పుడు ప‌ర్మిష‌న్లు ఇచ్చారు. ఈనెలాఖ‌రున ఈ సినిమా కొత్త షెడ్యూల్ మొద‌ల‌వుతుంద‌ని భావించారు. అయితే.. ఆగ‌స్టు వ‌ర‌కూ ఈ సినిమా ప‌ట్టాలెక్క‌ద‌ని తేలిపోయింది. ఈ సినిమా కోసం మూడు ప్ర‌త్యేక‌మైన సెట్ల‌ని అన్న‌పూర్ణ స్టూడియోలో వేస్తున్నారు. ఓ స్ట్రీట్ సెట్‌, షిప్‌, హాస్పిట‌ల్ సెట్ల‌ని ప్ర‌త్యేకంగా రూపుదిద్దుతున్నారు. అవి పూర్త‌వ్వ‌డానికి మ‌రో నెల రోజులు టైమ్ ప‌డుతుంద‌ట‌. ఆగ‌స్టు నుంచి షూటింగ్ ప్రారంభించే అవ‌కాశాలున్నాయ‌ని చిత్ర‌బృందం చెప్పింది. అప్పుడు కూడా ప్ర‌భాస్ వ‌స్తాడా, రాడా? అన్న విష‌యంలో గ్యారెంటీ లేదు. హీరో, హీరోయిన్లు లేని కొన్ని ప్ర‌ధాన స‌న్నివేశాల‌తో షూటింగ్ ప్రారంభిస్తారు. ప్ర‌భాస్ ఆ త‌ర‌వాత మెల్ల‌గా జాయిన్ అవుతాడు. ఈ సినిమాలో పూజా హెగ్డే క‌థానాయిక‌. ఆమె కాల్షీట్లు దొర‌క‌డం చిత్ర‌బృందానికి క‌ష్ట‌మైపోయింది. ప్ర‌భాస్ – పూజాల‌పై కొన్ని ముఖ్య‌మైన సన్నివేశాల్ని తెర‌కెక్కించాల్సివుంది. పూజా ఎప్పుడు అందుబాటులో ఉంటుంది? అనే విష‌యాన్ని బ‌ట్టే… కొత్త షెడ్యూల్ ఆధార‌ప‌డి ఉంది.