భారతీయ జనతా పార్టీ అంతర్గత వ్యవహారాల్లో జోక్యం చేసుకుంటూ.. వైసీపీ ఎంపీ విజయసాయిరెడ్డి ఆ పార్టీ నేతల్ని పదే పదే రెచ్చగొడుతున్నారు. టీడీపీ నుంచి తమ పార్టీలోకి సామ, భేద, దాన, దండోపాయాల్ని ప్రయోగించి… లాక్కుంటున్నారు. అదే సమయంలో.. కొంత మంది బీజేపీలో చేరుతూంటే.. వాళ్లు మాత్రం.. బీజేపీని నాశనం చేయడానికి వెళ్తున్నారని.. రోజూ.. ఏదో ఓ రూపంలో కామెంట్లు చేస్తున్నారు. దీంతో..బీజేపీ నేతలు చిర్రెత్తిపోయింది. విజయసాయిరెడ్డిని ఇలా వదిలేస్తే… తాము చులకన అయిపోతామని అనుకున్నారేమో కానీ… ఏపీ బీజేపీ వ్యవహారాల ఇన్చార్జ్ సునీల్ ధియోధర్ సహా.. పలువురు నేతలు సోషల్ మీడియాలోనే.. విజయసాయిరెడ్డికి కౌంటర్ ఇవ్వడం ప్రారంభించారు.
అన్ని రంగుల్ని కలుపుకునే బలం బీజేపీకి ఉందని… చెబుతూ.. సునీల్ ధియోధర్ నేరుగా.. విజయసాయిరెడ్డికి కౌంటర్ ఇచ్చారు. కేంద్రంలో నామినేటెడ్ పదవి ఉన్న విష్ణువర్ధన్ రెడ్డి సహా పలువురు బీజేపీ నేతలు విజయసాయిరెడ్డిపై ఘాటుగా విరుచుకుపడ్డారు. మరోసారి బీజేపీ అంతర్గత వ్యవహారాల్లో జోక్యం చేసుకుంటే బాగుండదని హెచ్చరించారు. అయితే.. ఈ విమర్శలన్నింటిపై సైలెంట్‌గా ఉంటున్న విజయసాయిరెడ్డి.. కన్నా లక్ష్మినారాయణను మాత్రం.. అదే పనిగా టార్గెట్ చేస్తున్నారు. తమ పార్టీ అంతర్గత విషయంలో గతంలో కన్నా మాట్లాడారంటూ.. ఎదురుదాడికి దిగారు. ఆయన కూడా.. టీడీపీ వ్యక్తి అన్నట్లుగా చెప్పుకొచ్చారు. విజయసాయిరెడ్డి చాలా పకడ్బందీగా.. బీజేపీని టార్గెట్ చేసి… బలపడకుండా చేస్తున్నారని.. టీడీపీని బూచిగా చూపి.. పబ్బం గడుపుకుంటున్నారన్న అభిప్రాయానికి బీజేపీ నేతలు వచ్చినట్లుగా తెలుస్తోంది.
విజయసాయిరెడ్డి విషయంలో.. బీజేపీ నేతలు ఇక ఏ మాత్రం.. సంయమనం పాటించాల్సిన అవసరం లేదని భావిస్తున్నట్లుగా తెలుస్తోంది. విజయసాయిరెడ్డి కూడా ఇదే ఎఫెక్ట్ కోరుకున్నారేమో కానీ.. అదే పనిగా… ఆ పార్టీ నేతల్ని రెచ్చగొడుతున్నారు. బీజేపీ నాయకులపై.. వ్యాఖ్యలు చేస్తున్నారు. అయితే విజయసాయిరెడ్డి ఇక్కడ రిజర్వేషన్లు పాటిస్తున్నారు. ఏపీ బీజేపీలో ఉన్న రెండు వర్గాల్లో.. వైసీపీకి మద్దతుగా ఉండే వర్గం.. విమర్శలు చేసినా స్పందించడం లేదు. మరో వర్గం చిన్న విమర్శ చేసినా విరుచుకుపడుతున్నారు. సోము వీర్రాజు.. చాలా రోజుల నుంచి ఇళ్ల స్థలాల్లో భారీగా అవినీతి జరిగిందని ఆరోపిస్తున్నారు. దాని గురించి చెప్పని విజయసాయిరెడ్డి.. టీడీపీ హయాంలో కట్టిన ఇళ్ల నిర్మాణంలోనూ అవినీతి జరిగిందని చెప్పారంటూ… సోమువీర్రాజును పొగిడినట్లుగా ట్వీట్ చేశారు. ఈ వ్యవహారాలన్నీ చూస్తూంటే.. బీజేపీని విజయసాయిరెడ్డి కావాలనే రెచ్చ గొడుతున్నారేమో అన్న అభిప్రాయానికి రాజకీయవర్గాలు వస్తున్నాయి.
