అంద‌రి వ్య‌క్తిగ‌త జీవితాల్లో వేలు పెట్టి – వినోదం చూస్తుంటాడు రాంగోపాల్ వ‌ర్మ‌. కాదేదీ క‌విత‌ను అన‌ర్హం అన్న‌ట్టు.. ఏ అంశ‌మైనా, ఎవ‌రి జీవితమైనా త‌న సినిమాల‌కు క‌థా వ‌స్తువుగా మారిపోతుంటుంది. వ్య‌క్తులు, సంఘ‌ట‌న‌ల‌పై సినిమాలు తీయ‌డంలో ఆయ‌న దిట్ట‌. ఇప్పుడూ అదే ప‌నిచేస్తున్నాడు. అలాంటి వ‌ర్మ‌పైనే ఓ సినిమా తీస్తే…? జొన్నవిత్తుల అదే ప‌నిచేస్తున్నారు. ‘ఆర్జీవి’ అంటూ ఓ ప్రాజెక్టు మొద‌లెట్టారు. అయితే అది ఎంత వ‌ర‌కూ వ‌చ్చిందో తెలీదు గానీ, ఇప్పుడు వ‌ర్మ‌పై మ‌రో సినిమా రాబోతోంది. అదే.. `ప‌రాన్న‌జీవి`.

ప‌వ‌న్ అభిమానులు కొంత‌మంది క‌లిసి ఈ ప్రాజెక్టు డిజైన్ చేసిన‌ట్టు తెలుస్తోంది. ప‌వ‌న్ పై ఇప్పుడు వ‌ర్మ `ప‌వ‌ర్ స్టార్‌` అనే సినిమా తీస్తున్నాడు క‌దా? దానికి ఇది సెటైర్ అన్న‌మాట‌. వ‌ర్మ కెరీర్ ఎలా మొద‌లైంది? ఎలా ప‌త‌న‌మైంది? వాడ్కా ముచ్చ‌ట్లు, త‌న వ్య‌క్తిత్వం.. ఇవ‌న్నీ క‌ల‌బోసి ఈ సినిమా సిద్ధం అవుతోంద‌ట‌. ఇది కూడా ఓటీటీలోనే విడుద‌ల కానుంది. స‌రిగ్గా వ‌ర్మ స్టైల్ లోనే ఈ సినిమా తీస్తున్నార్ట‌. వ‌ర్మ‌పై వ‌ర్మే సినిమా తీసుకుంటే ఎలా ఉంటుందో ఈ సినిమా అలా ఉండ‌బోతోంద‌ట. వ‌ర్మ‌లా క‌నిపించే ఓ జూనియ‌ర్ ఆర్టిస్టుని కూడా వెదికి ప‌ట్టుకున్నారు. దానికి సంబంధించిన డిటైల్స్ త్వ‌ర‌లోనే బ‌య‌ట‌కు వ‌స్తాయి.