భారతీయ జనతా పార్టీని టార్గెట్ చేయడానికి.. కన్నా లక్ష్మినారాయణను చాలా ప్లాన్డ్‌గా వాడుకుంటున్నారు విజయసాయిరెడ్డి. తాజాగా మూడు రాజధానుల బిల్లును గవర్నర్ ఆమోదించవద్దంటూ.. కన్నా లక్ష్మినారాయణ లేఖ రాశారు. దీన్ని ట్విట్టర్‌లో ప్రశ్నించిన విజయసాయిరెడ్డి … చంద్రబాబు తొత్తు కన్నా లక్ష్మినారాయణ అని డిసైడయిందని.. తేల్చేశారు. ఎలా అంటే… మూడు రాజధానులపై బీజేపీ అభిప్రాయానికి భిన్నంగా.. కన్నా లక్ష్మినారాయణ… గవర్నర్‌కు లేఖ రాశారట. అందుకే.. కన్నా హైకమాండ్ ఆగ్రహానికి గురయ్యారట. బహుశా.. తాము కన్నాపై ఆగ్రహం వ్యక్తం చేశామని.. బీజేపీ హైకమాండ్ నేరుగా విజయసాయిరెడ్డికి చెప్పిందేమో కానీ.. ఆయన ట్వీట్ చేసేశారు. నిజానికి మూడు రాజధానులకు వ్యతిరేకమని బీజేపీ చెబుతోంది. అయితే.. రాష్ట్ర పరిధిలోని అంశమని ట్విస్ట్ ఇస్తోంది. అయినప్పటికీ విజయసాయిరెడ్డి అడ్వాంటేజ్ తీసుకుని.. బీజేపీ విధానాన్ని డిసైడ్ చేస్తున్నారు.

కన్నాపై విజయసాయిరెడ్డి చేసిన ట్వీట్‌కు మరో నేత లంకా దినకర్ కౌంటర్ ఇచ్చారు. రఘురామకృష్ణరాజు .. ఏదో ఒకటి మాట్లాడినప్పుడల్లా… విజయసాయిరెడ్డి ఇలాంటి వేషాలు వేస్తూంటారని మండిపడ్డారు. అసలు చంద్రబాబు తొత్తు విజయసాయిరెడ్డినేనని.. పిచ్చి సలహాలిచ్చే.. జగన్ ను ముంచేస్తున్నారని మండిపడ్డారు. మరో వైపు కన్నా కూడా.. కౌంటర్ ఇచ్చారు కానీ.. చంద్రబాబు హయాంలో లక్షల కోట్ల అవినీతి జరిగిందని పుస్తకాలేశారని.. వాటిపై ఏం చర్యలు తీసుకున్నారని ప్రశ్నించారు. బీజేపీ అంతర్గత విషయాల్లో… విజయసాయిరెడ్డి జోక్యం చేసుకోవడం ఇదే మొదటి సారి కాదు. గతంలోనూ పలుమార్లు.. కన్నాను టార్గెట్ చేస్తూ.. తీవ్ర విమర్శలు చేశారు.

అయితే.. కన్నాను విజయసాయిరెడ్డి టార్గెట్ చేసినప్పుడు.. బీజేపీలోని ఇతర నేతలెవరూ స్పందించడం లేదు. సాక్షాత్తూ ఏపీ బీజేపీ అధ్యక్షుడిపైనే.. దారుణమైన వ్యాఖ్యలు చేస్తున్నా.. ఇతర నేతలు సపోర్ట్‌గా రావడం లేదు. విజయసాయిరెడ్డికి కౌంటర్ ఇవ్వడానికి సిద్ధపడటం లేదు. మరీ దారుణమైన విమర్శలు చేసినప్పుడు… మొక్కుబడిగా.. సునీల్ ధియోధర్ లాంటి వాళ్లు… హెచ్చరికల ట్వీట్లు చేస్తున్నా… దాన్ని విజయసాయిరెడ్డి పట్టించుకోవడం లేదు. మళ్లీ మళ్లీ… విమర్శలు గుప్పిస్తూనే ఉన్నారు. కేంద్ర బీజేపీ.. వైసీపీకి అనుకూలంగా ఉందని.. అందుకే… రాష్ట్ర నేతల్ని వైసీపీ అవమానించినా పట్టించుకోవడం లేదన్న అభిప్రాయంలో కొంత మంది నేతలు ఉన్నారు. అందుకే.. విజయసాయిరెడ్డి.. చివరికి బీజేపీ విధానాల్ని కూడా డిసైడ్ చేస్తున్నారని అసంతృప్తి వ్యక్తం చేస్తున్నారు.