తెలంగాణ సీఎం కేసీఆర్ ఏదైనా ఒక అంశాన్ని టేకప్ చేస్తే.. దానిపైనే పూర్తి సమయం కేటాయిస్తారు. ఇప్పుడు ఆయన కొత్తగా నిర్మిస్తున్న సచివాలయం డిజైన్లపై దృష్టి పెట్టారు. ఇప్పటికే పలుమార్లు గంటల తరబడి…సమీక్షలు చేసిన ఆయన…మంగళవారం మరోసారి సమీక్షలు చేయనున్నారు. అవసరమైన మార్పులు చేర్పులు చేయనున్నారు. ఇప్పటి వరకూ ఉన్న ప్లాన్ ప్రకారం.. కేసీఆర్ అదృష్ట సంఖ్య ఆరు కలసి వచ్చేలా ఆరు అంతస్తులు… కట్టాలని అనుకున్నారు. కానీ… ఇప్పుడు మరో అంతస్తు చేరుస్తున్నారు. ఏడు అంతస్తులు కట్టి.. సీఎంవో … ఏడో అంతస్తులో ఉండేలా ప్లాన్ చేసుకుంటున్నట్లుగా చెబుతున్నారు.

నిజానికి… సచివాలయం కూల్చివేత ప్రారంభమైన రోజే… కొత్త డిజైన్ ను తెలంగాణ సర్కార్ మీడియాకు పంపింది. అదే ఫైనల్ అని అనుకున్నారు. ప్రముఖ ఆర్కిటెక్ట్ హాఫిజ్ కాంట్రాక్టర్ దాన్ని డిజైన్ చేశారు. కానీ… అది ప్రాథమిక డిజైన్ మాత్రమే. దానిపై కేసీఆర్ వరుస సమీక్షలు నిర్వహిస్తున్నారు. ఇతర ఆర్కిటెక్ట్‌ల నుంచి ఆలోచనలు ఆహ్వానిస్తున్నారు. ఇలా చెన్నైకు చెందిన ఓ ఆర్కిటెక్ట్… అన్ని రకాల వాస్తు సలహాలతో.. ఏడు అంతస్తుల డిజైన్ ను అధికారులకు పంపినట్లుగా తెలుస్తోంది. అది కేసీఆర్ కు కూడా నచ్చడంతో దానిపై సమీక్ష చేయనున్నారు.

కరోనా సమయంలో… ప్రజల ప్రాణాలు కాపాడేందుకు… సీఎం కేసీఆర్ పూర్తి స్థాయిలో సమయం వెచ్చించాల్సింది పోయి.. కొత్త సచివాలయం అంటూ. .. కాలయాపన చేయడం ఏమిటని… విపక్షాలు మండిపడుతున్నాయి. అయితే… కేసీఆర్ ఇప్పుడు అలాంటివేమీ పట్టించుకోవడం లేదు. తెలంగాణలో వైరస్ విస్తరణ తగ్గిందని ప్రభుత్వం ఓ అంచనాకు వచ్చింది. వెయ్యిలోపే కేసులు నమోదవుతున్నాయి. కరోనా కారణంగా.. ఇతర అంశాలను ఆపాల్సిన అవసరం లేదని తెలంగాణ సర్కార్ భావిస్తోంది. చరిత్రలో తెలంగాణ సచివాలయం నిలిచిపోయేలా నిర్మాణం ఉండాలని కేసీఆర్ పట్టుదలతో ఉన్నారు.