అవినీతిని అరికట్టేందుకు రూ. 2వేల నోట్లను కేంద్రం నియంత్రించేసింది కానీ.. అదేమీ ఈ తరహా సంపాదనకు అలవాటు పడిన వారికి అడ్డం కాలేదు. రూ. 2వేల నోట్లు కాకపోతే.. రూ. ఐదు వందల నోట్లు తీసుకురా అంటున్నారు.. గోదాల్లో తెస్తావో.. ట్రక్కుల్లో తెస్తావో నీ ఇష్టం అనే చాయిస్ ఇస్తున్నారు. ఇలా ఓ అధికారి.. రూ. కోటి పది లక్షల లంచాన్ని .. అదీ కూడా అచ్చంగా నోట్ల రూపంలో ఉన్న లంచాన్ని తీసుకుంటూ పట్టుబడిన ఘటన హైదరాబాద్ శివారులోని కీసరలో చోటు చేసుకుంది.

ఎమ్మార్వో జారీ చేసే క్యాస్ట్, ఇన్కం సర్టిఫికెట్లకు ఓ వెయ్యే.. రెండు వేలో లంచం తీసుకుంటారు. కీసర ఎమ్మార్వో మాత్రం.. అలాంటి వాటి జోలికి వెళ్లనే వెళ్లరు. ఆయన రేంజ్ ఏంటో ఆయనకు బాగా తెలుసు. ఓ భూవివాదాన్ని సెటిల్ చేసేందుకు రూ. కోటి పది లక్షల లంచం తీసుకునేందుకు బేరం మాట్లాడుకున్నాడు. ఆయన రెండు కోట్లు అడిగాడు.. కానీ కరోనా టైంలో అంత కష్టం అని.. 90 లక్షలు డిస్కౌంట్‌కు మాట్లాడుకున్నాడు రియల్ ఎస్టేట్ బ్రోకర్. ఆ డబ్బుల్ని… గోతాల్లో కుక్కి.. కారులో వేసుకుని తీసుకొచ్చి నాగరాజు ఇంట్లో ఇచ్చాడు. ఈ వ్యవహారంపై నిఘా పెట్టిన ఏసీబీ అధికారులు దాడి చేయడంతో.. మొత్తం గుట్టురట్టయింది. ఆ గోతాల్లోని డబ్బుని అలా పరిచి చూపించడానికి ప్రయత్నిస్తే ఇల్లంతా పట్టేసింది. కొసమెరుపేమిటంటే… ఆ ఇంట్లో సోదాలు చేస్తే.. మరో రూ. పాతిక లక్షలు దొరికాయి.

కీస‌ర ఎమ్మార్వో పరిధఇలోని రాంపల్లి లో 28 ఎకరాల ల్యాండ్ వివాదంలో ఉంది. ఆ స్థలాన్ని క్లియర్ చేసి.. కొనుగోలు చేసేందుకు ఓ ప్రముఖ రియల్ ఎస్టేట్ సంస్థ ముందుకొచ్చింది. దానికి ఓ ప్రముఖ నేత అనుచరుడు మధ్యవర్తిత్వం వహించాడు. మొత్తంగా డీల్ సెట్ చేసుకుని… మొత్తం అయిపోయిందనుకునే సమయంలో దొరికిపోయారు. ఇప్పుడా ప్రముఖ నేత అనుచరుడు చక్రం తిప్పుతాడు. ఆ నేత కనుసన్నల్లోనే ఇది జరిగి ఉంటుందనే అంచనాలు కూడా ఉన్నాయి. కాబట్టి.. దొరికినా సరే నాగరాజు చాలా దిలాసాగా ఉన్నాడు. తానే ఏసీబీ అధికారినన్నట్లుగా ఫోటోలకు ఫోజులిచ్చాడు.

ఈ నాగరాజు బ్యాక్ గ్రౌండ్ మామూలుగా లేదు. గతంలోనే పెద్ద ఎత్తున అక్రమస్తులతో పట్టుబడ్డాడు. ఆయన ఇంట్లో ఆస్తుల పత్రాలు.. విదేశీ మద్యం బాటిళ్లు దొరికాయి. కానీ ఆ కేసు ఏమయిందో కానీ మళ్లీ ల్యాండ్ డీల్స్ ఎక్కువగా జరిగే కీసరలోనే పోస్టింగ్ తెచ్చుకున్నారు. మళ్లీ వేట ప్రారంభించారు. మళ్లీ దొరికాడు. కానీ మళ్లీ.. పోస్టింగ్ తెచ్చుకోవడానికి పెద్ద సమయం పట్టదనేది అందరికీ తెలిసిన విషయం.