ధోనీ రిటైర్‌మెంట్ ఎప్పుడు అనే ప్ర‌శ్న‌కు ఇక తెర‌ప‌డింది. అంత‌ర్జాతీయ క్రికెట్ నుంచి నిష్కమిస్తున్న‌ట్టు ఎం.ఎస్‌.ధోనీ ప్ర‌క‌టించాడు. ఈ మేర‌కు ఇన్‌స్ట్రాగ్రామ్ లో ఓ ప్ర‌క‌ట‌న చేశాడు. ఈ క్ష‌ణం నుంచి తాను రిటైర్ అయిన‌ట్టు భావించాల‌ని పేర్కొన్నాడు. ఇంత కాలం త‌న‌కు మ‌ద్ద‌తు ఇచ్చిన అభిమానుల‌కు కృత‌జ్ఞ‌త‌లు తెలిపాడు. వ‌చ్చే నెల‌లో ఐపీఎల్ ప్రారంభం కానుంది. ఐపీఎల్ లో మాత్రం ధోనీ బ్యాటింగ్ చూడొచ్చు.

కొంత‌కాలంగా.. ధోనీ రిటైర్మెంట్ పై చ‌ర్చ జ‌రుగుతోంది. ధోనీ కూడా అంత‌ర్జాతీయ క్రికెట్ కి దూరంగా ఉంటూ వ‌చ్చాడు. `రిటైర్‌మెంట్ నిర్ణ‌యం అన్న‌ది పూర్తిగా ధోనీకే వ‌దిలేస్తున్నాం` అంటూ విరాట్ కోహ్లీ కూడా చాలాసార్లు మీడియాకు చెప్పాడు. అలానే జ‌రిగింది. ఎలాంటి హ‌డావుడీ లేకుండా, త‌న చివ‌రి అంత‌ర్జాతీయ మ్యాచ్ కూడా ఆడ‌కుండా సైలెంట్ గా గుడ్ బై చెప్పేశాడు ధోనీ. వ‌న్డే కెరీర్ కూడా ఇలానే సింపుల్ గా ముగించాడు. చాలామంది క్రీడాకారులు త‌మ చివ‌రి మ్యాచ్ గుర్తుండిపోయేలా ఉండాల‌ని భావిస్తారు. ప్రేక్ష‌కుల స‌మ‌క్షంలో వీడ్కోలు ప‌లకాల‌ని అనుకుంటారు. కానీ ధోనీ మాత్రం ఎలాంటి ఆర్భాటాల‌కూ పోకుండా గుడ్ బై చెప్పేశాడు.