నాని అంటే ఓ ఎక్స్‌పెక్టేష‌న్ ఉంటుంది. ఇంద్ర‌గంటి మోహ‌న కృష్ణ అన్నా.. ఓ అంచ‌నా ఉంటుంది.

మ‌ధ్య‌లో సుధీర్‌బాబు లాంటి మ‌రో యంగ్ హీరో క‌లిశాడు. ఈ ముగ్గురి కాంబినేష‌న్ అన‌గానే.. ఎలాంటి అంచనాలు ఉంటాయో.. వాటికి భిన్నంగా `వి` సినిమాని తీర్చిదిద్దారు. నాని న‌టించిన 25వ సినిమా ఇది. ఇప్ప‌టి వ‌ర‌కూ నానిపై ఉన్న గుడ్ బోయ్‌, ల‌వ‌ర్ బోయ్‌, లాంటి ఇమేజ్‌ల‌కు భిన్నంగా ఈ సినిమా ఉండ‌బోతోంద‌న్న విష‌యం ముందు నుంచీ అర్థ‌మ‌వుతూనే ఉంది. నాని విల‌న్ గా న‌టిస్తాడ‌ని చిత్ర‌బృందం ముందే చెప్పేసింది. కానీ `వి` ట్రైల‌ర్ చూస్తే.. ఇంత విల‌నిజం మాత్రం క‌చ్చితంగా ఎక్స్‌పెక్ట్ చేయం.

ఇంద్ర‌గంటి ఇప్ప‌టి వ‌ర‌కూ సాఫ్ట్ సినిమాలే తీశాడు. కానీ.. `వి` ట్రైల‌ర్ చూస్తే.. ఇంద్ర‌గంటిలో ఇంకో యాంగిల్ ఉందా? అనిపిస్తుంది. ఓ సైకోకీ, పోలీస్ అధికారికి మ‌ధ్య జ‌రిగే పోరాటం ఇది. ఎత్తుకు పై ఎత్తుల‌తో ఆస‌క్తిగా సాగే మిస్ట‌రీ. యాక్ష‌న్ ని ఓ రేంజ్ లో చూపించాడు ఇంద్ర‌గంటి. ట్రైల‌ర్ చూస్తే… ఓ యాక్ష‌న్ ప్యాక్డ్ సినిమాగా `వి`ని మ‌లిచార‌నిపిస్తోంది. నాని విభిన్న‌మైన డైలాగ్ డెలివ‌రీ, సుధీర్ బాబు కండ‌లు, ఇంద్ర‌గంటి టేకింగ్‌, యాక్ష‌న్ విజువ‌ల్స్ ఈ సినిమాపై అంచ‌నాల్ని ఎక్క‌డికో తీసుకెళ్లిపోయాయి. సెప్టెంబ‌రు 5న అమేజాన్ ప్రైమ్ లో ఈ సినిమా విడుద‌ల కాబోతోంది.