ఆంధ్రజ్యోతి పత్రిక రాస్తున్న కథనాలు ప్రభుత్వానికి ఆగ్రహం తెప్పిస్తున్నాయి. మీడియాపై కేసులు పెట్టేందుకు తెస్తున్న జీవో ఆధారంగా ఆ కథనాలన్నింటిపై లీగల్ నోటీసులు పంపుతున్నారు. కానీ అప్పుడప్పుడు.. ఎవరి పేరుతో పంపాలో కూడా అర్థం కావడం లేదు. అందుకే.. ఓ వ్యవస్థ పేరు పెట్టేసి లీగల్ నోటీసులు పంపేస్తూ.. మరీ ఇంత అనాలోచితంగా.. ప్రభుత్వ న్యాయయంత్రాంగం పని చేస్తుందా అనిపించేలా.. చేస్తున్నారు. గతంలో.. హైకోర్టు న్యాయమూర్తులపై నిఘా పెట్టారనే కథనాన్ని ఆంధ్రజ్యోతి ప్రచురించింది. దానిపై ఆంధ్రజ్యోతి పత్రికకు లీగల్ నోటీసులు పంపింది. ఇప్పుడు తాజాగా.. ఇద్దరు కలెక్టర్లు.. స్త్రీ లోలురు అనే అర్థం వచ్చేలా హనీ ట్రాప్ అనే కథనాన్ని ఆంధ్రజ్యోతి వేసింది. దీనిపై ప్రభుత్వానికి కోపం వచ్చింది. వెంటనే లీగల్ నోటీసును పంపేశారు.
పై నుంచి ఆదేశాలొచ్చాయి కాబట్టి.. ఆంధ్రజ్యోతికి లీగల్ నోటీసులు పంపేశారు. కానీ.. ఎవరి పేరు మీద పంపాలో.. ఆ పంపిన పీపీకి అర్థమవలేదు. ఎవరో ఇద్దరు కలెక్టర్ల పేర్లు చెబితే.. ఆ కథనంలో ఉన్నది వారేనని అనుకుంటారు. అలాగని పేర్లు లేకుండా నోటీసులు ఇవ్వలేదు. అందుకే.. కలెక్టర్లు అంతా అన్నట్లుగా ఓ లీగల్ నోటీసులు సర్వ్ చేసేశారు. ఐఏఎస్ అయినప్పటి నుంచి అందరూ.. కలెక్టర్లే కారు.. కలెక్టర్లుగానే ఉండిపోరు. అయినప్పటికీ.. ఎవరి పేరు చూపించకుండా.. కలెక్టర్ల పేరుతో .. కలెక్టర్ల గొప్పదనం చెబుతూ.. ఓ వ్యాసం రాసి మరీ నోటీసు ఇచ్చేశారు.
వాస్తవానికి కలెక్టర్లు అయినంత మాత్రాన అందరూ సుద్దపూసలు కారు. అందరూ చెడ్డవాళ్లు కాదు. సమాజంలో మంచీ చెడూ ఎలా భాగమో.. అన్ని వ్యవస్థల్లోనూ అంతే. ఆంధ్రజ్యోతి.. అలా కలెక్టర్ల వ్యవస్థలో ఇలా ఇద్దరున్నారని.. తనకు తెలిసిన సమాచారం రాసింది. ప్రత్యేకంగా పేరు పెట్టి రాయలేదు. దానికే ఉలిక్కిపడిపోయింది ప్రభుత్వం. నోటీసులు పంపేసింది. ఇలాంటి నోటీసులు చెల్లవని.. ప్రత్యేకంగా ఎవరికైనా పరువు నష్టం జరిగితే.. వారే నోటీసు ఇస్తే చెల్లుతుందని న్యాయవాదులు అంటున్నారు.
