ప‌వ‌న్ క‌ల్యాణ్ – క్రిష్ కాంబినేష‌న్ లో ఓ చిత్రం రూపుదిద్దుకుంటున్న సంగ‌తి తెలిసిందే. ఏ.ఎం.ర‌త్నం నిర్మాత‌. ప‌వ‌న్ పుట్టిన రోజు సంద‌ర్భంగా ఈ సినిమాకి సంబంధించిన ఓ అప్ డేట్ విడుద‌ల చేస్తున్నామ‌ని చిత్ర‌బృందం నిన్న‌నే ప్ర‌క‌టించింది. దాంతో ప‌వ‌న్ సినిమా టైటిల్ చెబుతారేమో అని అభిమానులంతా ఆశించారు. ఈ సినిమా కోసం `విరూపాక్ష‌` అనే టైటిల్ ప‌రిశీలిస్తున్నారు. అదే ఖాయం అవుతుంద‌నుకున్నారు. అయితే టైటిల్ ని చిత్ర‌బృందం రివీల్ చేయ‌లేదు. ప‌వ‌న్ లుక్ నీ బ‌య‌ట‌పెట్ట‌లేదు. కేవ‌లం ప్రీ లుక్ తో స‌రిపెట్టింది. చేతి ఉంగరాలు, న‌డుమున చుట్టుకున్న వ‌స్త్రం.. దాన్ని అంటిపెట్టుకున్న గ‌ద్ద‌.. ఇదీ ప‌వ‌న్ లుక్ లో క‌నిపిస్తున్న విశేషాలు. ఇందులో ప‌వ‌న్ క‌ల్యాణ్ ఓ గ‌జ దొంగ‌గా న‌టిస్తున్నాడ‌ని ప్ర‌చారం జ‌రుగుతోంది. లుక్ చూస్తుంటే… దొంగలానే ఉన్నాడు. మొఘ‌లాయిల ప‌రిపాల‌నా కాలం నాటి క‌థ ఇది. కోహినూర్ వ‌జ్రం చుట్టూ క‌థ తిర‌గ‌బోతోంద‌ని వార్త‌లు వ‌స్తున్నాయి. కీర‌వాణి సంగీతం అందిస్తున్న ఈ చిత్రానికి రాజీవ‌న్ క‌ళా ద‌ర్శ‌కుడిగా ప‌నిచేస్తున్నారు.