వెబ్ సిరీస్‌ల‌పై స్టార్లు దృష్టి పెడుతున్నారు. మంచి కంటెంట్ ఉంటే…. వెబ్ సిరీస్‌కీ, సినిమాకీ పెద్ద తేడా లేదు కూడా. తాజాగా మ‌రో యువ హీరో సుధీర్ బాబు కూడా వెబ్ సిరీస్‌ల‌పై ఆస‌క్తి చూపిస్తున్నాడు. “వెబ్ సిరీస్‌లు చేయాల‌న్న ఆస‌క్తి ఉంది. ఒక‌ట్రెండు ఇంట్రెస్టింగ్ ప్రాజెక్ట్స్ కూడా నా ద‌గ్గ‌ర‌కు వ‌చ్చాయి. వాటిపై ఇప్పుడు దృష్టి పెడుతున్నారు. వెబ్ సిరీస్‌ల‌ను నిర్మించే ఆలోచ‌న కూడా ఉంది..” అంటూ త‌న ఇష్టాల్ని వెలిబుచ్చాడు సుధీర్ బాబు. త‌ను ఓ క‌థానాయ‌కుడిగా న‌టించిన `వి` అమేజాన్ ప్రైమ్ లో విడుద‌ల కానుంది. నిజానికి ఈ సినిమా థియేట‌ర్లోనే చూడాల‌న్న‌ది సుధీర్ బాబు అభిమ‌తం. కానీ కుద‌ర‌ని ప‌క్షంలోనే.. ఓటీటీకి ఇచ్చేశారు.

“థియేట‌ర్లో విడుద‌ల చేస్తే మ‌రింత బాగుండేది. కానీ.. ఇప్పుడున్న ప‌రిస్థితుల్లో అది సాధ్యం కాలేదు. ఓటీటీ కూడా చ‌క్క‌టి ప్ర‌త్యామ్నాయంగా మారింది. ఈ సినిమా ఎక్కువ మందికి చేరువ అయితే థియేట‌ర్లో విడుద‌ల కాలేద‌న్న లోటు తీరిపోతుంది” అని చెప్పుకొచ్చాడు సుధీర్ బాబు. ఈ సినిమా గురించి మ‌హేష్ బాబు చాలా ఆస‌క్తిగా ఎదురు చూస్తున్నాడ‌న్నాడు సుధీర్‌. “వి ట్రైల‌ర్ మ‌హేష్‌కి బాగా న‌చ్చింది. నా యాక్ష‌న్ పార్ట్ గురించి ఆరా తీశాడు. సినిమా చూడ్డానికి ఉత్సాహంగా ఎదురు చూస్తున్నా అన్నాడు. ఇంద్ర‌గంటి సినిమాలంటే త‌‌న‌కు చాలా ఇష్టం. స‌మ్మోహ‌నం ఆయ‌న‌కు మ‌హేష్‌కి బాగా న‌చ్చింది“ అన్నాడు సుధీర్‌బాబు. మ‌రి `వి` సినిమా చూశాక మ‌హేష్ ఏమంటాడో చూడాలి.