కోవిడ్ కార‌ణంతో షూటింగుల‌న్నీ ఎక్క‌డ‌క‌క్క‌డ ఆగిపోయాయి. ప్ర‌భుత్వం స‌డ‌లింపులు ఇచ్చినా, చిన్న చిత‌కా సినిమాలే మొద‌ల‌య్యాయి త‌ప్ప‌, స్టార్లెవ‌రూ బ‌య‌ట‌కు రాలేదు. ఇటీవ‌ల నాగార్జున `వైల్డ్ డాగ్` షూటింగ్ మొద‌ల‌య్యారు. ఇప్పుడు తండ్రి బాట‌లోనే త‌న‌యుడు కూడా అడుగులేస్తున్నాడు. నాగ‌చైత‌న్య క‌థానాయ‌కుడిగా న‌టిస్తున్న చిత్రం `ల‌వ్ స్టోరీ`. శేఖ‌ర్ క‌మ్ముల ద‌ర్శ‌కుడు. ఈ సినిమా కొత్త షెడ్యూల్ ఈ రోజు మొద‌లైంది. కోవిడ్ నిబంధ‌న‌ల ప్ర‌కార‌మే చిత్రీక‌ర‌ణ జ‌రుపుతున్నామ‌ని, అన్ని ముందు జాగ్ర‌త్త చ‌ర్య‌లూ తీసుకుంటున్నామ‌ని చిత్ర‌బృందం ప్ర‌క‌టించింది. వేస‌విలో విడుద‌ల కావాల్సిన సినిమా ఇది. కుద‌ర్లేదు. సింగిల్ షెడ్యూల్ లోనే మిగిలిన షూటింగ్ అంతా పూర్తి చేయాల‌ని చిత్ర‌బృందం భావిస్తోంది. అన్ని సినిమాల్లానే ఈ చిత్రానికీ ఓటీటీ ఆఫ‌ర్లు బాగా వ‌స్తున్నాయి. కానీ శేఖ‌ర్ క‌మ్ముల మాత్రం థియేట‌ర్లో రిలీజ్ చేయ‌డానికే ఆస‌క్తి చూపిస్తున్నారు.