ద‌ర్శ‌కుడు ర‌విబాబు ఏమాత్రం ఫామ్ లో లేడు. అవును 2, ల‌డ్డూబాబు, అదుగో… ఇలా వ‌రుస పెట్టి ఫ్లాపులే ఇచ్చాడు. ర‌విబాబు సినిమా అంటే.. `ఎలా ఉంటుందో చూద్దాం` అనే ఫీలింగ్ త‌న‌కు తానుగా పోగొట్టుకున్నాడు. ఈ డిజాస్ట‌ర్ల వ‌ల్ల త‌న మార్కెట్ కూడా బాగా దెబ్బ‌తింది. ఈ ప‌రిస్థితుల్లో ర‌విబాబు నుంచి వ‌స్తున్న మ‌రో సినిమా `క్ర‌ష్‌`. అడ‌ల్ట్ కామెడీతో ఈ సినిమా చేస్తున్నాన‌ని, 18 సంవ‌త్స‌రాలు పైబ‌డిన వాళ్లే చూడాల‌ని ర‌విబాబు ముందే హింట్ ఇచ్చేశాడు. ఇటీవ‌ల విడుద‌ల చేసిన టీజ‌ర్ చూస్తే.. `వామ్మో` అనుకోవాల్సిందే. డ‌బుల్ మీనింగ్ ఏంటి? సింగిల్ మీనింగ్ లోనే అన్నీ చెప్పేశాడు.

ఈమధ్య బీ గ్రేడ్ వెబ్ సిరీస్‌ల‌లో చూపిస్తున్న సీ గ్రేడ్ సెక్సీ సీన్ల‌తో ఈ టీజ‌ర్ వ‌దిలాడు. క‌చ్చితంగా ఇది యూత్ ని టార్గెట్ చేసిన సినిమా అని అర్థ‌మైపోతోంది. థియేట‌ర్‌లో విడుద‌ల చేయాలంటే సెన్సార్ అడ్డంకులు త‌ప్ప‌వు. అందుకే ఈ సినిమాని నేరుగా ఓటీటీలోనే దింపాల‌ని ప్లాన్ చేశాడు ర‌విబాబు. దానికి త‌గ్గ‌ట్టుగానే టీజ‌ర్ వ‌ద‌ల‌గానే… ఈ సినిమాకి ఆఫ‌ర్లు వ‌రుస క‌డుతున్నాయి. ఆహా, జీ 5 ఇప్ప‌టికే మంచి రేట్లు కోడ్ చేసిన‌ట్టు తెలుస్తోంది. అతి త‌క్కువ పెట్టుబ‌డితో ర‌విబాబు ఈ సినిమా ని పూర్తి చేశాడు. పెట్టుబ‌డితో పోలిస్తే.. ఇప్పుడు రెండింత‌ల లాభం వ‌స్తోంద‌ట‌. అందుకే ఈ సినిమాని ఓటీటీకి ఇచ్చేయాల‌ని ఫిక్స‌య్యాడు. హార‌ర్‌, థ్రిల్ల‌ర్‌, కాన్సెప్ట్ సినిమాలు.. వీటిలో లేని మైలేజీ ఈ బూతు సినిమాలో ఉంద‌న్న విష‌యం `క్ర‌ష్‌` మ‌రోసారి నిరూపించిన‌ట్టైంది. ఇది వ‌ర‌కు రవిబాబు తీసిన సినిమాలు డిజాస్ట‌ర్లు అవ్వ‌డ‌మే కాదు, ఆర్థికంగానూ న‌ష్టాలు మిగిల్చాయి. క్ర‌ష్ ఫ‌లితం ఎలా ఉన్నా – క్యాష్ మాత్రం ముందే వ‌చ్చేస్తోంది. ర‌విబాబు త‌న గోల్ ని రీచ్ అయిపోయిన‌ట్టే.