రాష్ట్ర ప్రభుత్వ నిధుల కష్టాలు తీర్చేందుకు టీటీడీ సిద్ధమయింది. శ్రీవారి సొమ్మును బ్యాంకుల్లో ఫిక్స్‌డ్ డిపాజిట్లుగా చేసే బదులుగా ప్రభుత్వానికే వడ్డీకి ఇవ్వాలని నిర్ణయించింది. ఈ మేరకు టీటీడీ నిర్ణయం తీసుకోవడం కలకలం రేపుతోంది. మొదట సెంట్రల్ గవర్నమెంట్ సెక్యూరిటీస్ అని నిర్ణయం తీసుకున్నారు. మళ్లీ దానికి రాష్ట్ర ప్రభుత్వ సెక్యూరిటీలు అని సవరణ చేశారు. అంటే.. ఉద్దేశపూర్వకంగానే… శ్రీవారి నిధులను.. మళ్లించడానికి ఓ ప్లాన్ ప్రకారం ఇలా చేస్తూ వచ్చారని స్పష్టమవుతోంది.

శ్రీవారి ఫిక్స్‌డ్ డిపాజిట్లను బ్యాంకుల నుంచి విత్ డ్రా చేసి మరీ ప్రభుత్వ బాండ్లను కొనే అవకాశం ఉంది. బ్యాంకుల ద్వారా ప్రస్తుతం 3 నుంచి 4 శాతం మాత్రమే వడ్డీ లభిస్తోందని.. అదే బాండ్ల ద్వారా 7 శాతం లభించే అవకాశం ఉందని టీటీడీ అధికారులు అంచనా వేస్తున్నారు. కేంద్ర, రాష్ట్ర ప్రభుత్వాల బాండ్లని చెబుతున్నారు కానీ.. టీటీడీ అసలు ఉద్దేశం మాత్రం ఏపీ సర్కార్ కి శ్రీవారి నిధులు మళ్లించడమేనని అంచనా వేయడం సులువే. ఏపీ సర్కార్‌కు ఎక్కడా అప్పు పుట్టడం లేదు. ఆర్బీఐలో తీసుకోవాల్సిన రుణం పరిధి దాటిపోయింది.

ఎక్కడా అవకాశం లేకపోవడంతో.. శ్రీవారి నిధులపై కన్నేసినట్లుగా తెలుస్తోంది. ఈ నిర్ణయం మరోసారి టీటీడీపై తీవ్రమైన వివాదం రేగడం ఖాయంగా కనిపిస్తోంది. ఇప్పటికే శ్రీవారి భూముల అమ్మకంపై రేగిన వివాదంతో.. ఆ నిర్ణయాన్ని ప్రభుత్వం వెనక్కి తీసుకుంది. హిందూ ఆలయాలపై దాడులు జరుగుతున్న సమయంలో.. ఇలాంటి తీవ్రమైన నిర్ణయాన్ని టీటీడీ లేదా.. ప్రభుత్వం తీసుకుంటుందా.. అన్న చర్చ కూడా జరుగుతోంది. టీటీడీ ఇలాంటి నిర్ణయం తీసుకోబోతోందని.. గత నెల పదిహేడో తేదీనే తెలుగు 360 వెల్లడించింది.

https://www.telugu360.com/te/ttd-funds-to-turn-into-ap-govt-bonds/