ఎట్ట‌కేల‌కు `అయ్య‌ప్ప‌యుమ్ కోషియ‌మ్‌` రీమేక్‌కి ప‌వ‌న్ క‌ల్యాణ్ గ్రీన్ సిగ్న‌ల్ ఇచ్చేశాడు. దాంతో ఈ రీమేక్ పై ఓ క్లారిటీ వ‌చ్చేసింది. బాల‌కృష్ణ – ర‌వితేజ‌, రానా – ర‌వితేజ‌… ఇలా చాలా కాంబినేష‌న్ల‌ని మార్చీ.. మార్చీ.. చివ‌ర‌కు ప‌వ‌న్ క‌ల్యాణ్ – రానాకి ఫిక్స‌య్యారు. రానా పేరు అధికారికంగా ప్ర‌క‌టించ‌క‌పోయినా 99 శాతం ఆయ‌న ఖాయ‌మైన‌ట్టే.

ప‌వ‌న్ రాక‌తో.. ఈ రీమేక్ లెక్క‌ల‌న్నీ మారిపోబోతున్నాయి. `అయ్య‌ప్ప‌యుమ్ కోషియ‌మ్‌`లో బీజూ మీన‌న్ పోషించిన పాత్ర‌లో ప‌వ‌న్ క‌నిపించ‌నున్నాడు. అక్క‌డ బీజూకు ఉన్న ఇమేజ్ వేరు, ఇక్క‌డ ప‌వ‌న్‌కి ఉన్న ఇమేజ్ వేరు. ఆ పాత్ర రూపు రేఖ‌ల్ని పూర్తిగా మార్చాల్సిందే. ఈ సినిమాలో ప‌వ‌న్ ని ఓ సూప‌ర్ కాప్ గా చూపిస్తున్నామ‌ని చిత్ర‌బృందం ముందే హింట్ ఇచ్చేసింది. `అయ్య‌ప్ప‌యుమ్‌..`లో బీజూది సూప‌ర్ కాప్ పాత్ర‌యితే కాదు. దాన్ని బ‌ట్టి… ప‌వ‌న్ కోసం ఈ పాత్ర‌ని ఎంత మారుస్తున్నారో అర్థం చేసుకోవొచ్చు. సాగ‌ర్ చంద్ర ఈ సినిమా స్క్రిప్టుని ఎప్పుడో సిద్ధం చేసేశాడు. ఇప్పుడు త్రివిక్ర‌మ్ `చేయి` చేసుకోవాల్సిన ప‌రిస్థితి వ‌చ్చింది. ఎందుకంటే… అటు ప‌వ‌న్, ఇటు సితార ఎంట‌ర్‌టైన్‌మెంట్స్.. రెండింటికీ త్రివిక్ర‌మ్ ఆప్తుడే. త్రివిక్ర‌మ్ ప్రోగ్భ‌లం వ‌ల్లే… ప‌వ‌న్ ఈ రీమేక్ ఒప్పుకున్న‌డ‌న్న టాక్ న‌డుస్తోంది. అలా చూసినా త్రివిక్ర‌మ్ హ్యాండు ఈ సినిమాలో ఉంటున్న‌ది సుస్ప‌ష్టం. `వ‌కీల్ సాబ్` అవ్వ‌గానే ఈ రీమేక్‌ని మొద‌లెట్టాల‌ని ప‌వ‌న్ చూస్తున్నాడు. రెండంటే రెండు నెల‌ల్లో ఈ రీమేక్‌ని పూర్తి చేయాల‌ని చెప్పాడ‌ట‌. అంటే.. రానా డేట్లు, షెడ్యూళ్లూ అన్నీ స‌ర్దుబాటు చేయాల్సిందే. ప‌వ‌న్ కాక‌పోతే.. సితార ఎంట‌ర్‌టైన్మెంట్స్ ఈ సినిమాని మెల్ల‌గా మెట్లెక్కించేది. ప‌వ‌న్ కోసం… మిగిలిన సినిమాల్నీ ప‌క్క‌న పెట్టి, దీన్ని ముందుకు తీసుకురావాల్సిన ప‌రిస్థితి వ‌చ్చింద‌ప్పుడు. చూద్దాం.. రాను రాను.. ఇంకెన్ని మార్పులు వ‌స్తాయో..?