క‌రోనా లాంటి సంక్షోభ స‌మ‌యంలో.. కొంత‌మంది రియ‌ల్ హీరోలు బ‌య‌ట‌కు వ‌చ్చారు. వాళ్ల‌లో సోనూసూద్ ఒక‌డు. అడిగిన‌వాళ్ల‌కూ, అడ‌గని వాళ్ల‌కు సైతం సాయం చేసి – శ‌భాష్ అనిపించుకున్నాడు. ఎంతోమందికి స్ఫూర్తిగా నిలిచాడు. చిత్ర‌సీమ‌లో త‌న‌కు ఇప్పుడు మ‌రింత గౌర‌వం పెరిగింది. ఎక్క‌డ అడుగుపెట్టినా… స‌న్మానాలు, స‌త్కారాలు. అందుకు త‌ను అన్ని విధాలా అర్హుడు కూడా.
తాజాగా.. `ఆచార్య` సెట్లో అడుగుపెట్టాడు సోనూసూద్. చిరు -కొర‌టాల శివ కాంబినేష‌న్‌లో రూపుదిద్దుకుంటున్న చిత్ర‌మిది. కాజ‌ల్ క‌థానాయిక. ఇటీవ‌ల షూటింగ్ మొద‌లైంది. సోనూసూద్‌కి ఓ కీల‌క పాత్ర ద‌క్కింది. ఈ రోజే సోనూసూద్ సెట్లోకి అడుగుపెట్టాడు. అందుకే.. చిత్ర‌బృందం సోనూకి చిరు స‌త్కారం అందించింది. త‌నికెళ్ల భ‌ర‌ణి, కొర‌టాల ఇద్ద‌రూ క‌లిసి, సోనూని సాద‌రంగా సెట్లోకి ఆహ్వానించారు. త్వ‌ర‌లోనే చిరు కూడా `ఆచార్య` సెట్లో అడుగుపెట్ట‌బోతున్నాడు.
