సినిమావాళ్ల‌కు సెంటిమెంట్లు ఎక్కువ. మ‌హేష్‌బాబు సైతం అందుకు అతీతం కాదు. మ‌హేష్‌కీ కొన్ని సెంటిమెంట్లు ఉన్నాయి. మూడ‌క్ష‌రాల టైటిల్ ని పెట్టుకోవ‌డం మ‌హేష్ సెంటిమెంట్. అది చాలాసార్లు వ‌ర్కువ‌ట్ అయ్యింది కూడా. త‌న సినిమా ముహూర్తం రోజున, తొలి క్లాప్ కొట్టేటప్పుడు రాక‌పోవడం సైతం మ‌హేష్‌కి అల‌వాటే. మ‌హేష్ సినిమా ఓపెనింగ్ జ‌రిగిన రోజు.. మ‌హేష్ ఆ స్పాట్ లో క‌నిపించ‌డు.
అదే సెంటిమెంట్ ఈ సారీ రిపీట్ అయ్యింది. మ‌హేష్ – ప‌రశురామ్ కాంబినేష‌న్‌లో రూపొందుతున్న చిత్రం `స‌ర్కారు వారి పాట`. కీర్తి సురేష్ క‌థానాయిక. ఈ చిత్రాన్ని ఈరోజు ఉద‌యం లాంఛ‌నంగా ప్రారంభించారు. హైద‌రాబాద్ లోని ఓ దేవ‌స్థానంలో పూజా కార్య‌క్ర‌మాల‌తో సినిమాకి శ్రీ‌కారం చుట్టారు. మ‌హేష్ భార్య న‌మ్ర‌త స్విచ్చాన్ చేస్తే.. మ‌హేష్ త‌న‌య సితార క్లాప్ కొట్టింది. జ‌న‌వ‌రి మొద‌టి వారం నుంచి చిత్రీక‌ర‌ణ ప్రారంభం కానుంది. త‌మ‌న్ ఈ చిత్రానికి సంగీతం అందిస్తున్నాడు. 2022 సంక్రాంతికి ఈ చిత్రాన్ని విడుద‌ల చేయాల‌న్న‌ది ప్లాన్‌.
