ప్ర‌భాస్ పై అభిమానుల‌కు కొంచెం అసంతృప్తి ఉంది. ప్ర‌తీ సినిమాకీ రెండేళ్లు కేటాయించుకుంటూ వెళ్తున్నాడ‌ని. తాను చేసేవ‌న్నీ భారీ బ‌డ్జెట్ చిత్రాలే. కాబ‌ట్టి.. ఆ మాత్రం స‌మ‌యం తీసుకోక త‌ప్ప‌ని ప‌రిస్థితి ఏర్ప‌డుతోంది. రాధే శ్యామ్ కూడా ఏళ్ల త‌ర‌బ‌డి మేకింగ్ లోనే ఉంది. `ఆది పురుష్‌` సినిమా కూడా అంతే. ఆ త‌ర‌వాత చేయ‌బోయే నాగ అశ్విన్ సినిమా విష‌యంలోనూ ఇదే రిపీట్ అవుతోంది. ఈ సినిమాకి రెండున్న‌రేళ్ల పాటు ప్ర‌భాస్ కాల్షీట్లు కావ‌ల్సివ‌స్తాయ‌ట‌. ఇప్పుడు ఈ విష‌యంలోనే ప్ర‌భాస్ పున‌రాలోచ‌న‌లో ప‌డిన‌ట్టు స‌మాచారం.

నిజానికి `రాధే శ్యామ్‌` త‌ర‌వాత‌.. నాగ అశ్విన్ సినిమానే ప్రారంభించాలి. దాన్ని ఓకే చేయ‌కుండా…. `ఆదిపురుష్‌`కి సై అన్నాడు. `ఆదిపురుష్‌` చేశాక‌.. నాగ అశ్విన్ సినిమా చేయాలిప్పుడు. కానీ… ఇప్పుడు ఈ సినిమాని ఇంకాస్త వెన‌క్కి జ‌రిపిన‌ట్టు తెలుస్తోంది. కేజీఎఫ్ ద‌ర్శ‌కుడు ప్ర‌శాంత్ నీల్ తో ప్ర‌భాస్ సినిమా దాదాపుగా ఖాయం అయ్యింది. నాగ అశ్విన్ సినిమాకంటే ముందు ప్ర‌శాంత్ నీల్ ప్రాజెక్టు మొద‌లయ్యే అవ‌కాశం ఉంద‌ని స‌మాచారం. నాగ అశ్విన్ బ‌ల్క్ కాల్షీట్లు అడిగాడ‌ని, ఆ సినిమా చేస్తున్న‌ప్పుడు మ‌రో సినిమా చేసే అవ‌కాశం లేద‌ని, అందుకే … మిగిలిన సినిమాల‌న్నీ పూర్తి చేసుకుని, ఆ త‌ర‌వాతే నాగ అశ్విన్ సినిమా మొదలెట్టాల‌ని ప్ర‌భాస్ తాజాగా నిర్ణ‌యించుకున్న‌ట్టు తెలుస్తోంది. 2021లోనూ నాగ అశ్విన్ సినిమా మొద‌లు కాక‌పోవొచ్చు. 2022 చివ‌ర్లో ఉండే అవ‌కాశం ఉంది.