మెగా ఫ్యామిలీ అంటే సుకుమార్ కి చాలా ఇష్టం. అల్లు అర్జున్‌తో త‌న ప్ర‌యాణం మొద‌లెట్టాడు. ఇప్పుడు బ‌న్నీకి హ్యాట్రిక్ సినిమా చేస్తున్నాడు. రామ్ చ‌ర‌ణ్ కెరీర్‌లోనే అతి పెద్ద హిట్ `రంగ‌స్థ‌లం`కి త‌నే ద‌ర్శ‌కుడు. ఇప్పుడు మెగా మేన‌ల్లుడు వైష్ణ‌వ్ తేజ్ `ఉప్పెన‌` సూత్ర‌ధారీ త‌నే.

తాజాగా.. సాయిధ‌ర‌మ్ తేజ్‌తోనే ఓ సినిమా చేస్తున్నాడు సుకుమార్‌. అయితే దీనికి త‌ను నిర్మాత మాత్ర‌మే. త‌న శిష్యుడు కాశీని ద‌ర్శ‌కుడిగా ప‌రిచ‌యం చేస్తున్నాడు. ఇదో థ్రిల్ల‌ర్‌. 1990 నేప‌థ్యంలో సాగే క‌థ‌. రామ్‌చ‌ర‌ణ్ `రంగ‌స్థ‌లం` కూడా అలాంటిదే. అందులోనూ థ్రిల్ల‌ర్ ల‌క్ష‌ణాలున్నాయి. కాక‌పోతే.. `రంగ‌స్థ‌లం` పొలిటిక‌ల్ డ్రామా. సాయిధ‌ర‌మ్ తేజ్ క్రైమ్ థ్రిల్ల‌ర్ అట‌. డ్ర‌గ్స్ మాఫియా నేప‌థ్యంలో సాగే క‌థ అని తెలుస్తోంది. కాక‌పోతే.. ఎమోష‌న్, డ్రామా, క్యారెక్ట‌రైజేష‌న్ విష‌యంలో మాత్రం `రంగ‌స్థ‌లం` ఛాయ‌లు క‌నిపిస్తాయ‌ని స‌మాచారం. సో.. మ‌రో సుక్కు బ్రాండ్ సినిమాని కాశీ నుంచి ఆశించొచ్చ‌న్న‌మాట‌.