దాదాపు ప‌ద‌మూడేళ్ల సుదీర్ఘ విరామం త‌ర‌వాత.. కెమెరా ముందుకొచ్చింది విజ‌య‌శాంతి. `స‌రిలేరు నీకెవ్వ‌రు`లో ఓ కీల‌క‌మైన పాత్ర‌లో క‌నిపించింది. ఆ సినిమా హిట్ట‌య్యింది. విజ‌య‌శాంతికి మంచి క‌మ్ బ్యాక్ గా నిలిచింది. ఆ విజ‌యంతో.. విజ‌య‌శాంతి ఇక వ‌రుస‌గా సినిమాలు చేస్తుందేమో అనుకున్నారంతా. విజ‌య‌శాంతి కూడా మంచి పాత్ర‌లొస్తే న‌టించ‌డానికి సిద్ధ‌మే అని ప్ర‌క‌టించింది.
అయితే ఇప్పుడు ఓ కీల‌క‌మైన నిర్ణ‌యం తీసుకుంది లేడీ అమితాబ్‌. సినిమాలకు ఇక పూర్తిగా దూరం అవ్వాల‌ని భావిస్తున్నారామె. ఈ విష‌యాన్ని ఓ ఇంట‌ర్వ్యూలోనూ చెప్పేశారు. ”సినిమాల‌పై నాకిప్పుడు ఎలాంటి ఆస‌క్తి లేదు. పూర్తిగా రాజ‌కీయాల‌వైపే ఉందామ‌నుకుంటున్నా. రెండు ప‌డ‌వ‌ల ప్ర‌యాణం ఇక్క‌డ అస్స‌లు కుద‌ర‌దు” అని కుండ‌బ‌ద్ద‌లుకొట్టేశారు. ఇటీవ‌ల రాముల‌మ్మ బీజేపీ తీర్థం పుచ్చుకున్న సంగ‌తి తెలిసిందే. ఇక ఆ పార్టీలో క్రియాశీల పాత్ర పోషించే ప‌నిలో ఉన్నారామె. అందుకే ఈ కీల‌క‌మైన నిర్ణ‌యం తీసుకున్నారు. ఆమ‌ధ్య చిరు సైతం విజ‌య‌శాంతితో క‌ల‌సి ఓ సినిమాలో న‌టించాల‌ని వుంద‌న్నారు. `స‌రిలేరు నీకెవ్వ‌రు` ప్రీ రిలీజ్ ఫంక్ష‌న్‌లో చిరు – విజ‌య‌శాంతిల సంభాష‌ణ అంద‌రికీ గుర్తుండే ఉంటుంది. చిరు ఇప్పుడు చేతి నిండా సినిమాల‌తో బిజీగా ఉన్నారు. ఆయ‌న సినిమాలో విజ‌య‌శాంతి క‌నిపిస్తే చూడాల‌న్న‌ది మెగా అభిమానుల ఆశ. అది విజ‌య‌శాంతి నిర్ణ‌యంతో అడియాశ‌గా మారిన‌ట్టే.
