ఆంధ్రప్రదేశ్‌లో సవాళ్ల రాజకీయం జోరుగా నడుస్తోంది. గతంలో అమరావతి రాజధానిగా అంగీకరించి.. అధికారంలోకి వచ్చాక మాట మార్చారు కాబట్టి .. రిఫరెండంకు వెళ్లాలని టీడీపీ అధినేత చంద్రబాబునాయుడు ముఖ్యమంత్రి జగన్‌ను డిమాండ్ చేస్తున్నారు. గతంలో ఓ సారి ఇలాంటి సవాల్ చేశారు. ఇప్పుడు అమరావతి ఉద్యమం ఏడాది పూర్తయిన సందర్భంగా అదే సవాల్ విసిరారు. దాంతో పాటు ఆయన మరో ఆఫర్ కూడా ఇస్తున్నారు. మూడు రాజధానులు కావాలని ప్రజలు నిర్ణయిస్తే తాను రాజకీయాల నుంచి వైదొలుగుతానని అంటున్నారు. చంద్రబాబు సవాల్ అని కాకపోయినా.. అమరావతి అంశంలో.. జగన్మోహన్ రెడ్డి మాట తప్పారన్న అభిప్రాయం బలంగా ప్రజల్లో ఏర్పడుతోంది.

సాక్షాత్తూ అసెంబ్లీలో ఆయన అమరావతికి అంగీకరించడం… 30వేలకుపైగా ఎకరాలు కావాలని చెప్పడం వంటివి సోషల్ మీడియాలో ఎప్పుడూ సర్క్యూలేట్ అవుతున్నాయి. గత ఎన్నికలకు ముందు తాను ఇల్లు కట్టుకున్నానని చంద్రబాబే కట్టుకోలేదని.. రాజధానిని ఎందుకు తరలిస్తానని ఆయన చెప్పారు. ఇక వైసీపీ నేతలు.. అమరావతిలోనే రాజధాని అని కుండబద్దలు కొట్టారు. ఆ వీడియోలన్నీ వైరల్ అవుతూనే ఉన్నాయి. ఇలాంటి సందర్భాల్లో మళ్లీ మూడు రాజధానులపై ప్రజాభిప్రాయం తీసుకోవాలన్న చర్చ జరుగుతోంది. అయితే వైసీపీ నేతలు మాత్రం ఈ విషయంలో ముందడుగు వేయాలనే ఆలోచన చేయడం లేదు.

టీడీపీ నేతలపై ఎదురు దాడి చేస్తున్నారు. చంద్రబాబు అసలు రాజకీయాల్లో ఉన్నారా అంటూ ఏదేదో మాట్లాడుతున్నారు కానీ.. అసలు విషయం మాత్రం చెప్పడం లేదు. కావాలంటే టీడీపీ ఎమ్మెల్యేలు రాజీనామాలు చేయాలని సలహాలిస్తున్నారు. దీంతో వైసీపీ నేతలు వెనుకడుగు వేస్తున్నారన్న అభిప్రాయం బలపడే అవకాశం కనిపిస్తోంది. ప్రతిపక్షాలు చెబుతున్నట్లుగా మూడు రాజధానులకు ప్రజల్లో మద్దతు లేదని ప్రభుత్వానికి కూడా తెలుసని అందుకే.. రిఫరెండానికి వెనుకడుగు వేస్తోందని విపక్షాలు ఇప్పటికే విమర్శలు ప్రారంభించాయి.