ఈ.వి.వి వారసుడిగా తెరంగేట్రం చేసిన నరేష్ ‘అల్లరి’ సినిమాతో ప్రేక్షకులకు దగ్గరయ్యాడు. తన మార్క్ కామెడీ పంచ్ డైలాగులతో ఆకట్టుకుంటున్న నరేష్ కు ఈ మధ్య టైం అసలు కలిసి రావట్లేదు. ‘సుడిగాడు’ తర్వాత నరేష్ హిట్ అనే మాటకు చాలా దూరంగా ఉన్నాడు. ఈ మధ్య వచ్చిన జేమ్స్ బాండ్ కూడా తనని నిరాశ పడేలా చేసింది. అయితే కెరియర్ పరంగా కాస్త తడబడుతున్న అల్లరి నరేష్ కు అద్భుతమైన ఆఫర్ తగిలిందట.
టాలీవుడ్ ట్రెండ్ సెట్ సినిమాలను నిర్మించిన బడా ప్రొడ్యూసర్ బి.వి.ఎస్.ఎన్ ప్రసాద్ నిర్మాణంలో అల్లరి నరేష్ హీరోగా ఓ సినిమా స్టార్ట్ అవనుందట. అత్తాంటికి దారేది, నాన్నకు ప్రేమతో వంటి సూపర్ హిట్ సినిమాలను నిర్మించిన బోగవల్లి ప్రసాద్ అల్లరి నరేష్ తో సినిమా తీయడం కాస్త ఆశ్చర్యంగానే ఉన్నా పెద్ద సినిమాలు కోట్లకు కోట్లు వసూళు చేసినా చిన్న సినిమాలు హిట్ అయితే వచ్చే లాభాలు వేరనే ఉద్దేశంతో నరేష్ తో సినిమాకు సిద్ధమయ్యాడని తెలుస్తుంది.
ఈ సినిమాను జి.నాగేశ్వర్ రెడ్డి డైరెక్ట్ చేయనున్నారని సమాచారం. ప్రస్తుతం ఈ దర్శకుడు మంచు విష్ణు, రాజ్ తరుణ్ తో మల్టీస్టారర్ సినిమా చేస్తున్నాడు. ఆ సినిమా పూర్తవగానే ఈ సినిమా పట్టాలెక్కనున్నదట. మరి బోగవల్లి ప్రసాద్ నిర్మిస్తున్న ఈ సినిమా అయినా అల్లరి నరేష్ కు సూపర్ హిట్ ఇచ్చి పూర్వ వైభవాన్ని తీసుకురావాలని కోరుకుందాం.
