చిరంజీవి – రామ్ చరణ్… ఇద్ద‌రినీ ఒకేసారి, వెండి తెర‌పై చూస్తే ఆ ఆనంద‌మే వేరు. మ‌గ‌ధీర‌లో ఓ స‌న్నివేశంలో చ‌టుక్కున మెరిశాడు చిరు. ఖైదీ నెం 150లో… చరణ్ కూడా చిరుతో స్టెప్పులు వేశాడు. కానీ ఇద్ద‌రూ పూర్తి స్థాయి పాత్ర‌ల్లో క‌నిపించ‌లేదు. `ఆచార్య`తో ఆ క‌ల నెర‌వేరుతోంది. చిరు న‌టిస్తున్న ఆచార్య‌లో చరణ్ ఓ కీల‌క‌మైన పాత్ర పోషిస్తున్న సంగ‌తి తెలిసిందే.
చరణ్ `ఆర్.ఆర్.ఆర్` తో బిజీగా ఉన్న నేప‌థ్యంలో.. త‌ను ఎప్పుడు ఆచార్య షూటింగ్ లో పాల్గొంటాడా? అని అభిమానులంతా ఆస‌క్తిగా ఎదురు చూశారు. ఇప్పుడు ఆ త‌రుణం వ‌చ్చేసింది. ఈరోజు నుంచి చరణ్ సెట్లో అడుగుపెట్టేశాడు. ఈ సినిమాలో సిద్దాగా క‌నిపించ‌బోతున్నాడు చరణ్. త‌న ప్రీ లుక్ ని సైతం.. చిత్ర‌బృందం విడుద‌ల చేసింది. చెవి పోగు, మెడ‌లో రుద్రాక్ష‌ల‌తో క‌నిపిస్తున్నాడు.. సిద్దా. ఈ సినిమాలో చిరు – చ‌ర‌ణ్‌లు గురు శిష్యులుగా క‌నిపించ‌బోతున్నార్ట. ఇద్ద‌రి మ‌ధ్యా సాగే స‌న్నివేశాలే.. క‌థ‌కి ప్రాణం అని తెలుస్తోంది. చరణ్ ప‌క్క‌న కూడా ఓ క‌థానాయిక ఉండ‌బోతోంది. ఆమె ఎవ‌ర‌న్న‌ది ఇంకా తేల‌లేదు. ఈ వేస‌వికి ఆచార్య ప్రేక్ష‌కుల ముందుకు రాబోతోంది.
