ఓటీటీ మార్కెట్ విస్కృత‌మ‌వుతోంది. అయితే దాన్ని ఎలా వాడుకోవాలి? ఎలాంటి క‌థ‌ల‌తో ఓటీటీకి వెళ్లాలి? అనేది తెలిసుండాలి. ఈ విష‌యంలో సునీల్ కాస్త అప్ర‌మ‌త్తంగానే ఉంటున్నాడు. ఆల్రెడీ.. ఓటీటీ కోసం ఓ సినిమా మొద‌లెట్టాడు సునీల్. వి.ఎన్‌.ఆదిత్య ద‌ర్శ‌క‌త్వం వ‌హిస్తున్న ఈ చిత్రంలో స‌లోని క‌థానాయిక. ఇది కేవ‌లం ఓటీటీ సినిమా. అందులోనే విడుద‌ల అవుతుంది. థియేట‌రిక‌ల్ రిలీజ్ లేదు. ఇప్ప‌టికే షూటింగ్ పూర్త‌య్యింది. ఇప్పుడు పోస్ట్ ప్రొడక్ష‌న్ కార్య‌క్ర‌మాలు జ‌రుగుతున్నాయి. ఆహాలో ఈ వెబ్ మూవీ విడుద‌ల‌య్యే ఛాన్సుంది.
మ‌రోవైపు.. ఇంకో ఓటీటీ ఫిల్మ్‌కి సునీల్ గ్రీన్ సిగ్న‌ల్ ఇచ్చాడు. ఇది కూడా ఆహా కోస‌మే అని టాక్‌. ఓ కొత్త ద‌ర్శ‌కుడు ఈ ప్రాజెక్ట్‌ని డీల్ చేయబోతున్నాడ‌ట. ఇప్పుడు ఓ వెబ్ సిరీస్ కి కూడా సునీల్ ప‌చ్చ జెండా ఊపాడని టాక్‌. సునీల్ కి హీరోగా మైలేజీ లేదు. త‌న‌తో సినిమాలు చేయ‌డానికి ప్రొడ్యూస‌ర్లుముందుకు రావ‌డం లేదు. కాక‌పోతే…. ఓటీటీలో మాత్రం సునీల్ కి మార్కెట్ ఉన్న‌ట్టే అర్థ‌మ‌వుతోంది. మ‌రోవైపు.. `పుష్ష`లాంటి సినిమాల్లో సునీల్ కీ రోల్స్ సంపాదించుకుంటున్నాడు. ఓటీటీలో హీరోయిజం.. వెండి తెర‌పై క‌మిడియ‌న్‌. ఇదీ.. ప్ర‌స్తుతం.. సునీల్ స్ట్రాట‌జీ.
