హీరోలు నిర్మాణం వైపు అడుగులేయ‌డం కొత్తేం కాదు. దాదాపుగా ప్ర‌తీ అగ్ర హీరోకీ ఓ సొంత నిర్మాణ సంస్థ ఉంది. తాజాగా ఈ జాబితాలో ర‌వితేజ కూడా చేర‌బోతున్న‌ట్టు స‌మాచారం. ఆర్‌.టీ వర్క్స్ పేరుతో ర‌వితేజ ఓ బ్యాన‌ర్‌ని స్థాపించే ప‌నిలో ఉన్నాడ‌ని తెలుస్తోంది. ఇప్ప‌టికే ఫిల్మ్ ఛాంబ‌ర్‌లో ఈ పేరుని రిజిస్ట‌ర్ చేయించిన‌ట్టు టాక్‌. అయితే… ఈ సంస్థ‌ని కేవ‌లం కొత్త‌త‌రాన్ని ప్రోత్స‌హించ‌డానికి ఓ వేదిక‌గా చేయబోతున్నాడ‌ట‌. కొత్త ద‌ర్శ‌కుల్ని, న‌టీన‌టుల్ని ఈ బ్యాన‌ర్ ద్వారా ప‌రిచ‌యం చేయ‌బోతున్నాడ‌ని టాక్‌. త‌న సినిమాల్ని త‌న బ్యాన‌ర్‌లో తీసుకునే ప‌ద్ధ‌తికి ర‌వితేజ స్వ‌స్తి చెప్ప‌బోతున్నాడ‌ట‌. ర‌వితేజ‌కు ఎప్ప‌టి నుంచో ద‌ర్శ‌క‌త్వం వ‌హించాల‌న్న కోరిక‌. అది ఇప్ప‌టి వ‌ర‌కూ నెర‌వేర‌లేదు. అంత‌కంటే ముందుగా నిర్మాత‌గా మార‌బోతున్నాడ‌న్న‌మాట‌. మ‌రి త‌న తొలి సినిమా ఎవ‌రితోనో, ఎప్పుడో??