గుంటూరు జిల్లా సత్తెనపల్లి ఎమ్మెల్యే అంబటి రాంబాబు.. సోషల్ మీడియాలో ఎలా ఫేమ్ తెచ్చుకోవాలో లెటెస్ట్‌గా కనిపెట్టినట్లుగా ఉన్నారు. ఓ యూట్యూబ్ చానల్‌కు ఇచ్చిన ఇంటర్యూలో… రెండు నాలుకల మాటలే కాదు.. వివాదాస్పద వ్యాఖ్యలు… ముఖ్యమంత్రిని ఇన్‌స్పైర్ చేయడానికి కబుర్లు చెప్పడమే కాదు.. చివరికి తన సొంత సామాజికవర్గాన్ని కూడా అత్యంత నీచంగా కించ పర్చుకోవడానికి వెనుకాడలేదు. ఆయన ఇంటర్యూ పేరుతో సోషల్ మీడియాలోకి వచ్చిన ట్రైలర్ ఇప్పుడు వైరల్ అవుతోంది. అంబటి రాంబాబు మాటల్ని చూసి.. అందరూ నోళ్లు నొక్కుకోవాల్సి వస్తోంది. చంద్రబాబు, లోకేష్‌లపై వైసీపీ నేతలు తరచూ చేసే విమర్శ… హైదరాబాద్‌లో ఉంటున్నారు. ఇంటర్యూలో కూడా.. అంబటి రాంబాబు అదే వాగ్ధాటి చూపించారు. ఆయన వాగ్ధాటికి యాంకర్ కూడా అబ్బురపడింది. అదే సమయంలో ఆమెకు ఓ డౌట్ వచ్చింది.. అదేమిటంటే.. చంద్రబాబు, లోకేష్ సరే.. ముఖ్యమంత్రిగా ప్రజల బాగోగులు దగ్గరుండి చూసుకోవాల్సిన జగన్ ఎందుకు బయటకు రావడం లేదు అని..? అదే విషయాన్ని నేరుగా అంబటి రాంబాబునే అడిగింది.

దానికి కూడా అంబటి రాంబాబు ఎక్కడా తడుముకోలేదు. అదే వాగ్దాటితో సమాధానం ఇచ్చారు.. ఏమని అంటే… ఇది కరోనా సమయం కదా.. కరోనా సమయంలో సీఎంను బయటకు రమ్మంటారా.. అసలుఅలా అడగడానికి కామన్‌సెన్స్ ఉందా.. అన్నట్లుగా రెచ్చిపోయారు. అంతకు ముందు ప్రతిపక్ష నేతలు కరోనాలో హైదరాబాద్‌లోనే ఉంటున్నారని విమర్శించిన ఆయన జగన్‌కు మాత్రం కరోనా వల్ల బయటకు రావడం లేదని చెప్పడానికి ఏ మాత్రం సంకోచించలేదు. ఆయన మాటల తీరు చూసి.. యాంకర్ కూడా అబ్బురపడింది. ఆ ఇంటర్యూలోనే మరో చోట.. కులాల ప్రస్తావన వచ్చింది. అందులో కాపు కులంపై అంబటి రాంబాబు చేసిన వ్యాఖ్యలు వెగటు పుట్టించేలా ఉన్నాయి. ఆయన కులాన్ని ఆయన అంత దారుణంగా కించ పర్చుకోవడం… సోషల్ మీడియాలోనూ హైలెట్ అవుతోంది.

ముఖ్యమంత్రికి .. ఆయన సామాజికవర్గం నచ్చదు కాబట్టి.. ఆయనను మెప్పించడానికి అంబటి రాంబాబు దిగజారిపోయారన్న చర్చ నడుస్తోంది. ఆయనపై సొంత సామాజికవర్గంలోనే తీవ్రమైన విమర్శలు వస్తున్నాయి. ఇప్పటికే పవన్ కల్యాణ్ ఏదైనా విమర్శలు చేస్తే.. ఆయనపై దాడి చేయడానికి .. ఆయనకు కులాన్ని అంటగట్టి.. నీచమైన విమర్శలు చేయడానికి కాపు సామాజికవర్గ మంత్రుల్నే వైసీపీ ఎగదోస్తుంది. ఇప్పుడు వారితోనే వారి కులాల్ని కూడా ఎగతాళి చేయిస్తున్నారన్న చర్చలు వినిపిస్తున్నాయి. మొత్తానికి అంబటి రాంబాబుకు ప్రత్యేకమైన వ్యక్తిత్వం అంటూ లేదని.. వైరల్అవుతున్న ఇంటర్యూతో తేలిపోయిందంటున్నారు. అందుకే.. ఇప్పటికి వైరల్ స్టార్‌గా అంబటి రాంబాబు నిలుస్తున్నారు.