విశాఖలోని ప్రభుత్వ ఆస్తులను తాకట్టు పెట్టాలని ప్రభుత్వం నిర్ణయించుకుంది. ఇలా తాకట్టు పెట్టడానికి కొన్ని ఆస్తులను అప్పుల కోసం సృష్టించిన స్టేట్ డెవలప్‌మెంట్ కార్పొరేషన్‌కు బదిలీ చేస్తున్నారు. ఇప్పటికే ఆస్తులను గుర్తించి.. నివేదిక రెడీ చేశారు. తదుపరి కేబినెట్ భేటీలో ఆస్తుల బదలాయింపు నిర్ణయం తీసుకుంటారు. అయితే అంతటితో వదిలి పెట్టడం లేదు. బీచ్ కారిడార్ అభివృద్ధి కోసం… మరో కార్పొరేషన్ ఏర్పాటు చేసి..భారీగా రుణ సమీకరణ చేయాలని నిర్ణయించారు. ఇందు కోసం వినూత్నంగా ఆలోచించి ‘బీచ్ రోడ్ కారిడార్ కార్పొరేషన్’ ఏర్పాటుకు సిద్ధమయ్యారు.

“బీచ్ రోడ్ కారిడార్ కార్పొరేషన్’ అంటే… బీచ్ రోడ్ లో రిసార్టులు, రెస్టారెంట్, గోల్ఫ్ కోర్టులు నిర్మించడం అన్నమాట. మరి వీటికినిధులు ఎక్కడి నుంచి వస్తాయి. అప్పులు చేయాలి. అప్పులు చేయాలంటే.. ఆ కార్పొరేషన్‌కు కొన్ని ఆస్తులు ఉండాలి. వాటిని తనఖా పెట్టాలి. అందుకే… ఈ “బీచ్ రోడ్ కారిడార్ కార్పొరేషన్’కి ఎక్కడెక్కడ ఎలాంటి నిర్మాణాలు చేపట్టాలని అనుకుంటున్నారో వాటినన్నింటినీ బదలాయించి తాకట్టు పెట్టేస్తారన్నమాట. విశాఖ-భీమిలి-భోగాపురం బీచ్ రోడ్ లో 570 ఎకరాలను ఇందు కోసం గుర్తించారు. వీటిని తాకట్టు పెట్టి దాదాపుగా రూ. వెయ్యి కోట్లు అప్పులు చేయాలని నిర్ణయించారు.

అప్పుల కోసం ఏపీ సర్కార్ కార్పొరేషన్ల మీద కార్పొరేషన్లు ప్రారంభించి.. అప్పులు చేస్తోంది. స్టేట్ డెలవప్‌మెంట్ కార్పొరేషన్ పేరుతో ఇప్పటికే పాతిక వేల కోట్ల దాకా అప్పులు చేసింది. మెడికల్ కార్పొరేషన్ ఏర్పాటుచేసి… ఉన్న.. కట్టబోయే మెడికల్ కాలేజీలన్నింటినీ తనఖా పెట్టేసి..మరో పదహారు వేల కోట్ల రుణానికి ప్లాన్ వేసింది. ఇంకా ఎక్కడ అవకాశం దొరికితే అక్కడ కార్పొరేషన్లు పెట్టి.. రుణాలకు ప్రయత్నిస్తోందని “బీచ్ రోడ్ కారిడార్ కార్పొరేషన్’ నిర్ణయంతోనే తెలిసిపోతోంది. మొత్తానికి ఆదాయం పెంచుకోకపోయినా అప్పుల్లో క్రియేటివిటీ అయినా చూపించడం రావాలని ఏపీ సర్కార్ నిరూపిస్తోంది.