తెలుగు మీడియా రంగంలో ఉత్తరాది ప్రాబల్యం పెరుగుతోంది. గతంలో తెలుగు మీడియాకు సంబంధించి పత్రికలైనా.. టీవీ చానళ్లు అయినా తెలుగు వారే ప్రారంభించేవారు. గతంలో ఉత్తదారికి చెందిన పెద్ద పెద్ద సంస్థలు మీడియా రంగంలోకి రావాలని చేసిన ప్రయత్నాలు ఫలించలేదు. పత్రికలకు.. టీవీలకు భారీ పెట్టుబడి కావాల్సి రావడం ఓ కారణం అయితే.. నిర్వహించడం కష్టమని భావించడం మరో కారణం. అయితే ఇప్పుడు కొత్త తరం మీడియా.. డిజిటల్ రూపంలో దూసుకు వస్తోంది. తెలుగు సంప్రదాయ మీడియా ఈ విభాగంలో వెనుకబడిపోతోంది.

ఉత్తరాది యాజమాన్యాల చేతుల్లోని సంస్థలు డిజిటల్ మీడియాపై ఆధిపత్యం ప్రదర్శిస్తున్నాయి. ఈ క్రమంలో తెలుగులోకి కొత్తగా ఆనందబజార్ పత్రిక గ్రూప్.. ఏబీపీ గ్రూప్‌ ఎంటరయింది. డిజిటల్ విభాగంలోకి అడుగు పెట్టింది. సైలెంట్‌గా పనులు చేసి.. యాప్‌ను .. వెబ్ సైట్‌ను ఆవిష్కరించేసింది. ఇరవై నాలుగు గంటల న్యూస్ చానల్ పెట్టే ఉద్దేశం లేదు కానీ.. రిలయన్స్‌కు చెందిన నెట్ వర్క్ 18, టైమ్స్ ఆఫ్ ఇండియాకు సంబంధించిన సమయం వంటి డిజిటల్ మీడియాతో పోటీ పడి తెలుగు మార్కెట్ సాధించుకునేందుకు ఏబీపీ శక్తియుక్తులను కేంద్రీకరించడం ఖాయంగా కనిపిస్తోంది. పెద్దగా పెట్టుబడి అవసరం లేకపోవడం… పరిమిత మ్యాన్ పవర్‌తో నడిపించుకునే సామర్థ్యం… కావాల్సినంత టెక్నాలజీ సపోర్ట్ ఉండటం ఏబీపీకి ప్లాస్ పాయింట్లుగా చెప్పుకోవచ్చు.

ఓ రకంగా భవిష్యత్ మీడియా అంతా డిజిటలేనని నమ్ముతున్న సమయంలో… తెలుగు వార్తా పారిశ్రామికవేత్తలు డిజిటల్ విభాగంలో వెనుకబడిపోతున్నారు. ఉత్తరాది వారు.. దూసుకెళ్తున్నారు. వారిది పెట్టుబడి మాత్రమే… అక్కడ పని చేసేవారంతా తెలుగువారే ఉంటారు. వారంతా ఆయా చానళ్లు.. టీవీల నుంచి వచ్చిన వారే. అందుకే ఇక్కడ పెట్టుబడి కోణంలో కాకుండా… పూర్తి స్థాయిలో న్యూస్ విషయంలా చూస్తే… కొత్త తరానికి ఆదరణ లభిస్తుందని అనుకోవాలి. తెలుగు డిజిటల్ మీడియాలో ఏబీపీ ఎంత షేర్ రాబట్టుకుంటుందో వేచి చూడాలి..!